سربراہ پاک بحریہ ظفر محمود عباسی نے کہا ہے کہ بحریہ ملک کو درپیش میری ٹائم چیلنجز اور ملکی سمندری حدود کے دفاع کے لیے ہمہ وقت تیار ہے۔

تفصیلات کے مطابق پاک بحریہ کے سربراہ ایڈمرل ظفر محمود عباسی نے پاک بحریہ کی مشق سی اسپارک 2020ءکے ڈی بریف سیشن میں بطور مہمان خصوصی خطاب کرتے ہوئے کہا کہ مشق سی اسپارک کامقصد پاک بحریہ کی حربی تیاری اور آپریشنل منصوبوں کی توثیق کرنا ہے۔

 ترجمان پاک بحریہ کے مطابق ڈی بریف سیشن میں ڈپٹی چیف آف نیول سٹاف (آپریشنز) نے مشق کے آپریشنل منصوبوں اور حکمت عملی کے مختلف پہلووں کا جائزہ پیش کیا جبکہ مشق کی مختلف سرگرمیوں کا جائزہ لینے کے بعد آئندہ لائحہ عمل کے لیے مختلف سفارشات بھی پیش کی گئیں۔

اس موقع پر سربراہ پاک بحریہ ایڈمرل ظفر محمود عباسی نے مختلف چیلنجز سے نبرد آزما ہونے کی صلاحیت، آپریشنل تیاری اورمشق کے کامیاب انعقاد پر اطمینان کا اظہار کیا۔

پاک بحریہ کے سربراہ سے امریکی سفیر کی ملاقات

تقریب سے خطاب کرتے ہوئے ایڈمرل ظفر محمود عباسی  کا کہنا تھا کہ پاک بحریہ ملک کو درپیش میری ٹائم چیلنجز کے دفاع کے لیے ہمہ وقت تیار ہے اور ہماری کامیابی کا انحصار اللہ پر یقین اور پیشہ ورانہ تربیت پر ہے جس کے آگے عددی برتری کوئی معنی نہیں رکھتی۔

مشق سی اسپارک کے ڈی بریف سیشن میں متعلقہ وزارتوں اور افواج پاکستان کے اعلی عہدیداروں نے بھی شرکت کی۔

واضح رہے کہ اس سے قبل بھی کمانڈر رائل بحرین نیول فورس ریئر ایڈمرل محمد یوسف العاصم نے نیول ہیڈ کوارٹرز اسلام آباد کا دورہ کیا تھا اور پاک بحریہ کے سربراہ امیر البحر ایڈمرل ظفر محمود عباسی سے ملاقات کی تھی۔

ملاقات کے دوران باہمی دلچسپی کے امور بشمول دونوں ملکوں کی بحری افواج کے مابین تعاون کو مزید فروغ دینے پر تبادلہ خیال کیا گیا تھا۔