پاکستان مسلم لیگ (ن) کے صدر قائد حزب اختلاف شہباز شریف نے کہا ہے کہ خواتین کے بغیر زندگی نامکمل اور تصویر کائنات بے رنگ ہے۔

تفصیلات کے مطابق پاکستان مسلم لیگ (ن) کے صدر قائد حزب اختلاف شہباز شریف نے  خواتین کے عالمی دن پر پیغام میں کہا کہ اللہ تعالی نے عورت کو ماں کی صورت اپنے تعارف کا ذریعہ بنایا ہے جس سے بڑا مقام، احترام، تعارف اور عزت اور نہیں ہوسکتی۔

شہباز شریف  نے کہا کہ آقائے محترم حضرت محمد صلی اللہ علیہ وسلم نے خواتین کی عزت و احترام کا ہمیں بہترین نمونہ اور رہنمائی عطا فرمائی ہے اور امہات المومنین، حضرت فاطمہ الزہرا اور اہل بیت اطہار ہمارے لئے رہنمائی کی بہترین مثالیں ہیں۔

پاکستان مسلم لیگ (ن) کے صدر نے یہ بھی کہا کہ اسلام نے عورت کو بے پناہ عزت اور حقوق عطا کئے ہیں، ماں کے قدموں کے نیچے جنت رکھ کر اللہ تعالی نے عورت کے مقام اور احترام کو واضح کردیا ہے۔

 قائد حزب اختلاف شہباز شریف کا کہنا تھا کہ ماں، بہن، بیٹی، بیوی کی صورت میں خواتین کی موجودگی سے ہی انسانی رشتے ناطے وجود میں آتے ہیں  اور خواتین نے تحریک پاکستان میں نے ناقابل فراموش کردار ادا کیا ۔

 پاکستان مسلم لیگ (ن) کے صدر کا یہ بھی کہنا تھا کہ مادرملت محترمہ فاطمہ جناح کے ہمراہ خواتین کا کردار تاریخ میں سنہری حروف سے درج ہے اور الحمداللہ آج ہماری خواتین زندگی کے ہر شعبے میں اپنی بہترین صلاحیتوں کا مظاہرہ کر رہی ہیں۔

8 مارچ خواتین کا عالمی دن

اپنے بیان میں شہباز شریف نے کہا کہ  دفاع سے تجارت، تعلیم وطب سے لے کر سائنس و ٹیکنالوجی اور صحافت  تک ہر شعبے میں خواتین اپنی صلاحیتوں کا لوہا منوارہی ہیں، ہم خوش قسمت ہیں کہ ہماری نصف زائد آبادی خواتین پر مشتمل ہے۔

شہباز شریف نے یہ بھی کہا کہ عورت کی تعلیم، اچھی صحت اور معاشی طور پر بااختیار ہونا کسی بھی معاشرے کی ترقی و خوشحالی کی ضمانت ہے جبکہ عورت معاشرے کے رویوں، برتاؤ اور ہمارے اس سے سلوک کا آئینہ ہے، کوئی خامیاں نظر آتی ہیں تو ہمیں اپنی انفرادی واجتماعی اصلاح پر توجہ دینا ہوگی۔

پاکستان مسلم لیگ (ن) کے صدر قائد حزب اختلاف شہباز شریف نے مزید کہاں کہ نواز شریف کی قیادت میں پاکستان مسلم لیگ (ن) نے ہمیشہ خواتین کے حقوق کے تحفظ اور فروغ کے لئے موثر اقدامات کئے اور ہم یقین دلاتے ہیں کہ اللہ تعالی نے دوبارہ موقع دیا تو خواتین کی تعلیم، صحت اور معاشی بہتری کے لیے تاریخی اقدامات کریں گے۔