جسٹس گلزاراحمد  نے بطور چیف جسٹس  سپریم کورٹ پہلاازخودنوٹس لے لیا ہے۔

تفصیلات کے مطابق  چیف جسٹس گلزار احمد کی جانب سے  پہلا از خود نوٹس جس موضوع پر لیا  گیا ہے وہ اسپتال میں کورونا وائرس سےمتعلق موجودہ  ناکافی سہولیات پر لیا گیا ہے۔

عدالت  کی جانب سے  چاروں صوبائی ایڈووکیٹ جنرلزاورچیف سیکرٹریز کونوٹس جاری کردئیے  گئے ہیں جبکہ  کورونا  وائرس سےمتعلق ازخود نوٹس کی سماعت 13 اپریل کو ہوگی ۔

چیف جسٹس کی سربراہی میں 5 رکنی لارجر بینچ سماعت کرے گا  جبکہ  کیس کی سماعت ویڈیولنک کے ذریعے ہوگی ۔

ملک میں کرونا وائرس کی روک تھام کے لئے کیا اقدامات اٹھائے گئے ہیں؟ ہسپتالوں میں کیا سہولیات دی گئی ہیں، اس سے متعلق گزشتہ ہفتے حکومت کے مشیر اور این ڈی ایم اے کی جانب سے بریفنگ عدالت کو دی گئی۔

تاہم اب سپریم کورٹ نے کورونا وائرس سے متعلق ہسپتالوں میں ناکافی سہولیات پر ازخود نوٹس پر سماعت 13 اپریل کے لیے مقرر کردی ہے۔

کیمپ جیل لاہور میں کورونا نے پنجے گاڑ لیے

چیف جسٹس کی سربراہی میں پانچ رکنی لارجر بینچ سماعت کرے گا، عدالت عظمی کی جانب سے اٹارنی جنرل، سیکرٹری صحت، سیکرٹری داخلہ سمیت چاروں صوبائی ایڈووکیٹ جنرلز اور چیف سیکریٹریز کو نوٹس جاری کر دیے گئے ہیں۔

سپریم کوٹ نے گزشتہ ہفتے قیدیوں کی رہائی سے متعلق کیس میں از خود نوٹس لیا جس پر اٹارنی جنرل نے عدالت کو کہا کہ حکومت ہسپتالوں میں دی گئی سہولیات اور کورونا وائرس کے تدارک کے لیے اٹھاۓ گئے اقدامات پر بریفنگ دینا چاہتی ہے،سپریم کورٹ کے ججز کو بریفنگ بھی دی گئی لیکن ہسپتالوں میں سہولیات کے فقدان کی بڑھتی ہوئی شکایات کے پیش نظر سپریم کوٹ نے اس ازخود نوٹس کیس کو سماعت کے لیے باقاعدہ اب مقرر کردیا ہے۔

یاد رہے کہ گذشتہ رو زلاہور  کی کیمپ جیل میں قید 50 فیصد قیدیوں کا  کورونا وائرس کا ٹیسٹ مکمل کیا گیا  تھا جس میں سے 58 قیدیوں کے ٹیسٹ کی رپورٹ مثبت آئی ہے۔

 کورونا وائرس کا شکار ہونے والے قیدیوں کا تعلق منشیات کے قیدیوں کی بیرک سے ہے۔

واضح رہے کہ کیمپ جیل میں 18 مارچ کوجس قیدی میں کوروناوائرس کی تصدیق ہوئی تھی  وہ منشیات اسمگل کرنے کی کوشش میں گرفتار ہوا تھا۔

ترجمان حکومت پنجاب مسرت چیمہ کے مطابق جیل کے تمام 2700 قیدیوں کو صوبے کی دیگر جیلوں میں منتقل کر کے کیمپ جیل کو 100 بستروں کے قرنطینہ مرکز میں تبدیل کیا جا رہا ہے