وزیر اطلاعات خیبر پختونخواہ اجمل وزیر کا کہنا ہے کہ خیبرپختونخوا حکومت ڈاکٹرز اور طبی عملےکے لئےحفاظتی سامان منگوارہی ہے جبکہ ہیلتھ ڈیپارٹمنٹ کو 8 ارب روپے بھی دیے گئے ہیں۔

تفصیلات کے مطابق وزیر اطلاعات خیبر پختونخواہ اجمل وزیر نے میڈیا بریفنگ کرتے ہوئے بتایا ہے کہ صوبے سے اب تک کورونا سے 16 افراد جاں بحق ہونے جبکہ 405 افراد میں اب تک وائرس کی تصدیق ہوئی ہے۔

اس موقع پر انہوں نے بتایا کہ پاک افغان بارڈر آج سے 9 اپریل تک افغان شہریوں کی واپسی کے لئے کھلا رہے گا کیونکہ پاک افغان سرحد کھولنے کا فیصلہ وفاقی حکومت نے کیا تھا۔

ینگ ڈاکٹروں نےسرکاری اسپتالوں کے بائیکاٹ کااعلان کردیا

ان کا کہنا تھا کہ خیبر پختونخوا کے زکوٰۃ فنڈ سے غریبوں کی مدد الگ سے کی جائے گی جبکہ زکوٰۃ فنڈ سے بھی مستحقین کو الگ سے 12 ہزار روپے دینے کا فیصلہ کیا گیا ہے۔

اجمل وزیر نے بتایا کہ محکمہ صحت کے لئے فوری طور پر 8 ارب روپے جاری کئے گئے، خیبرپختونخوا حکومت غریبوں کو بھی تنہا نہیں چھوڑے گی اس کے لئے امدادی رقوم کی شفاف تقسیم کا طریق کار بنایا گیا ہے۔

انہوں نے بتایا کہ وزیر اعلیٰ محمود کی صدارت میں کورونا سے متعلق خصوصی اجلاس ہوا جس میں کورونا کو پھیلنے سے روکنے کے لئے اقدامات پر اطمینان کا اظہار  کیا گیا۔

ان کا کہنا تھا کہ خیبر پختونخوا حکومت مزید طبی آلات اور حفاظتی سامان بھی منگوارہی ہے۔

یاد رہے کہ اس سے قبلکوئٹہ میں ینگ ڈاکٹرز کے حکومت کی جانب سے حفاظتی کٹس فراہم نہ کرنے پر احتجاج کے دوران پولیس نے لاٹھی چارج کرکے درجنوں ڈاکٹروں کو گرفتار کرلیا۔

ینگ ڈاکٹرز ایسوسی ایشن کی جانب سے جائزمطالبات پر پولیس کے لاٹھی چارج کرنے اور ینگ ڈاکٹرز کی گرفتاریوں پر سرکاری اسپتالوں میں بائیکاٹ کا اعلان کیا گیا ہے۔

ترجمان ینگ ڈاکٹرز ایسوسی ایشن ڈاکٹر یاسر نے اعلان کرتے ہوئے کہا کہ ڈاکٹروں کا اب ڈیوٹیاں دینا ناممکن ہے۔