چیئر مین پاکستان پیپلز پارٹی بلاول بھٹو زرداری کا کہنا ہے کہ عالمی طاقتوں کو اب  اپنا رویہ بدلنا ہوگا ۔

چیئرمین پاکستان پیپلز پارٹی بلاول بھٹو زرداری کا کورونا وائرس کی صورتحال پر اسکائی نیوز کو انٹرویو دیتے ہوئے کہنا تھا کہ  کورونا کی وباء سے باہمی عالمی تعاون سے ہی نجات حاصل کی جا سکتی ہے۔

چیئرمین پاکستان پیپلز پارٹی نے کہا کہ عالمی طاقتوں کو اب  اپنا رویہ بدلنا ہوگا ۔  آج بھی ایران پر پابندیاں ہیں جہاں لوگ کورونا کی وجہ سے مر رہے ہیں ۔انڈیا اب تک مقبوضہ کشمیر کو بند کیے بیٹھا ہے۔

 بلاول بھٹو زرداری کا کہنا تھا کہ  مقبوضہ کشمیر میں 250 دن سے لاک ڈاؤن ہے اور لوگوں کے پاس کوئی سہولت نہیں۔

انہوں نے کہا کہ  امیر اور وسائل رکھنے والے ممالک کو غریب اور کم وسائل والے ملکوں کی مدد کرنا ہوگی۔

چیئرمین پاکستان پیپلز پارٹی نے کہا کہ غریب ممالک کے پاس اتنے وسائل نہیں ہیں کہ وہ تن تنہا کورونا کا مقابلہ کر سکیں۔وسائل والے ممالک اور عالمی طاقتوں کو ٹیسٹنگ کٹس اور صحت کی سہولیات کی دنیا بھر میں منصفانہ تقسیم کرنا ہوگی۔

بلاول بھٹو زرداری نے مزید کہا کہ  پاکستان بھی کورونا سے بری طرح متاثر ہوا ہے ۔ہمارا نظام صحت اتنا وسیع نہیں کہ اس وبا ءکا مقابلہ کر سکیں۔ہم لاک ڈاؤن اور سماجی دوری کے ذریعے ہی اس وبا ءسے بچ سکتے ہیں ۔

انہوں نے کہا کہ   اٹلی اور برطانیہ جیسے ملکوں کا نظام صحت بھی کورونا کے پھیلاؤ کی وجہ سے بیٹھ گیا ہے ،ہمارے پاس تو اٹلی اور برطانیہ کے مقابلے میں صحت کا نظام بہت کمزور ہے۔

چیئرمین پاکستان پیپلز پارٹی نے کہا کہ اگر پاکستان میں کورونا کا پھیلاؤبڑھا تو ہمارا نظام صحت بیٹھ جائے گا۔پاکستان کی اپوزیشن نے وفاقی حکومت کو مشترکہ کاوشوں کی پیشکش کی ہے ۔

حکومت اکیلے کچھ نہیں کرسکتی، مخیر حضرات کو آگے آنا ہوگا، چیئرمین بلاول بھٹو زرداری

بلاول بھٹو زرداری  نے افسوس کا اظہار کرتے ہوئے کہا کہ وفاقی حکومت  کورونا سے نمٹنے کے لیے سست رفتاری سے کام کر رہی ہے۔

انہوں نے کہا کہ صوبے اپنے اپنے طور پر کام کر رہے ہیں ،وفاقی حکومت سے صوبوں کو بہت کم مدد مل رہی ہے ۔