چیئرمین این ڈی ایم اے لیفٹیننٹ جنرل محمد افضل نے کہا ہے کہ اس وقت ہماری سب سے بڑی ترجیح کورونا وائرس کے خلاف جدوجہد میں فرنٹ لائن پر موجود ڈاکٹرز، نرسوں اور پیرا میڈیکل سٹاف کو حفاظتی اور طبی سامان کی فراہمی ہے۔

تفصیلات کے مطابق ڈپٹی اسپیکر قومی اسمبلی قاسم خان سوری کی چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل محمد افضل سے ملاقات ہوئی ، جس میں بلوچستان میں کورونا وائرس اور لاک ڈاؤن کیوجہ سے پیدا شدہ صورتحال پر تبادلہء خیال کیا گیا ۔

ملاقات میں ڈپٹی اسپیکر قومی اسمبلی ن کہا کہ بلوچستان ایک پسماندہ صوبہ ہے اور موجودہ حالات میں محرومیاں مزید بڑھ گئی ہیں،بلوچستان کے حالات کو مدنظر رکھتے ہوئے کورونا وائرس سے نمٹنے کیلئے زیادہ سے زیادہ سہولیات فراہم کی جائیں ۔

 قاسم خان سوری نے یہ بھی کہا کہ کورونا وائرس کے خلاف جدوجہد میں فرنٹ لائن پر موجود بلوچستان کے ڈاکٹرز، نرسوں اور پیرا میڈیکل سٹاف کو زیادہ سے زیادہ حفاظتی اور طبی سامان فراہم کیا جائے۔

چین سے بارہ ٹن سامان کی دوسری کھیپ پہنچ گئی ہے، این ڈی ایم اے

ڈپٹی اسپیکر قومی اسمبلی قاسم خان سوری نے مزید کہا کہ چین کی حکومت کے شکر گزار ہیں کہ مشکل کی اس گھڑی میں ہمارے ساتھ کھڑی ہے اور بلا تعطل ضروری اشیاء کی فراہمی کر رہی ہے۔

اس موقع پر چیئرمین این ڈی ایم اے نے کہا کہ بلوچستان حکومت کو 4800 ٹیسٹنگ کٹس دی گئی ہیں جبکہ تقریباً 37 ہزار کٹس اسلام آباد میں قائم ریزرو رکھی گئی ہیں، بلوچستان کی پسماندگی کو مدنظر رکھتے ہوئے صوبہ کو ترجیحی بنیادوں پر حفاظتی سامان کی فراہمی کی جائے گی۔

چئیرمین ایم ڈی ایم اے لیفٹیننٹ جنرل محمد افضل نے ییہ بھی کہا کہ 6 اپریل تک ایک لاکھ کے قریب ذاتی حفاظتی آلات کے سیٹس جبکہ 15 اپریل تک مزید ایک لاکھ آلات کے سیٹس پاکستان پہنچ جائیں گی۔

چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل محمد افضل نے مزید کہا کہ بلوچستان حکومت سے بھی درخواست کی گئی ہے کہ دو لیبارٹریز کو اس قابل بنایا جائے تا کہ وہاں دو مزید مقامات جعفر آباد اور گوادر میں ٹیسٹنگ کی سہولیات فراہم کی جا سکیں۔