کورونا وائرس کے باعث حالیہ لاک ڈاؤن کی وجہ سے اسکولوں کی بندش کو گرمیوں کی تعطیلات قرار دیے جانے پر فیسوں میں 20 فیصد کمی کرنے کی ہدایت دے دی۔

تفصیلات کے مطابق پنجاب کے وزیر تعلیم مراد راس نے صوبے کے تمام نجی اسکولوں کی فیسوں میں 20 فیصد کمی کرنے کی ہدایت جاری کر دی ہے۔

قبل ازیں وزیر اعلیٰ پنجاب عثمان بزدار نے مراد راس کی سربراہی میں دو رکنی ٹیم تشکیل دی تھی۔

دو رکنی ٹیم میں پنجاب کے وزیر قانون راجہ بشارت بھی شامل تھے جس کا کام نجی اسکولوں کے مالکان سے ملاقات کرکے ان سے کورونا وائرس وبا کے دوران اسکول کی بندش پر فیس سے متعلق امور پر تبادلہ خیال کرنا تھا۔

یاد رہے کہ منگل کے روز دونوں وزرا نے نجی اسکول کے مالکان سے ملاقات کی جس میں اسکول ایجوکیشن ڈپارٹمنٹ کے سیکریٹری شہریار سلطان، ضلعی محکمہ تعلیم کے پرویز اختر اور نجی اسکولوں کے مالکان نے شرکت کی تھی۔

اس حوالے سے وزرا نے کہا کہ حکومت نے تمام اسکولوں کو کورونا وائرس کی وبا کی وجہ سے بند کیا تھا تاہم بعد ازاں اسے گرمیوں کی تعطیلات قرار دے دیا گیا۔

ان کا کہنا تھا کہ نجی اسکولوں کو اپریل اور مئی کی اپنی فیسوں میں سے 20 فیصد کم کرنا چاہیے تاکہ والدین کی تشویش کو دور کیا جاسکے اور کہا کہ اس دوران ٹیچر کو نہیں نکالا جائے گا۔

واضح رہے کہ والدین ایکشن کمیٹی کے ممبران نے کہا کہ اسکول پہلے ہی فیس پر عدالت کے احکامات پر عمل درآمد نہیں کر رہے ہیں اور فیسوں کی عدم ادائیگی کی وجہ سے ان کے بچوں کو رزلٹ کارڈز جاری نہیں کیے گئے ہیں۔