وزیرخارجہ  مخدوم شاہ محمود نے کہا ہے کہ ہماری پہلی ترجیح وطن واپسی کے منتظر، پاکستانیوں کی مرحلہ وار واپسی ہے۔

وزیر خارجہ شاہ محمود قریشی کی زیر صدارت وزارت خارجہ میں کورونا سے نمٹنے کے حوالے سے اجلاس ہوا، اجلاس میں بیرونی ممالک میں وطن واپسی کے منتظر پاکستانیوں کی مرحلہ وار وطن واپسی کو ممکن بنانے کیلئے مختلف پہلوؤں کا جائزہ لیا گیا،

وزارت خارجہ میں وزیر خارجہ شاہ محمود قریشی کی زیر صدارت ہونے والے اجلاس میں وفاقی وزیر برائے ہوا بازی غلام سرور خان ،معاونین خصوصی زلفی بخاری زلفی بخاری، ڈاکٹر ظفر مرزا ،ڈاکٹر معید یوسف،اعلی عسکری حکام ،اسپیشل سیکرٹری خارجہ، سیکرٹری ہوا بازی ڈویژن سمیت وزارت خارجہ کے سینئر حکام نے شرکت کی۔

اس موقع پر معاون خصوصی برائے صحت ڈاکٹر ظفر مرزا نے پاکستان میں کورونا کی موجودہ صورتحال ٹسٹنگ کی سہولت اور کوارنٹائین انتظامات کے حوالے سے مفصل بریفنگ دی جبکہ وزارت صحت، سول ایوی ایشن اتھارٹی، اورسیز ڈویژن، پی آئی اے اور دیگر متعلقہ اداروں سے موصول ہونیوالی تجاویز پر تفصیلی مشاورت کی گئی ۔

وزیرخارجہ مخدوم شاہ محمود قریشی کا اجلاس کے شرکا سے کہنا تھا کہ وزارت خارجہ میں قائم کرایسز مینجمنٹ سیل  دنیا بھر میں پاکستانی سفارتخانوں کے ساتھ مسلسل رابطے میں ہے اور ہماری پہلی ترجیح وطن واپسی کے منتظر، پاکستانیوں کی مرحلہ وار واپسی ہے۔

وزیر خارجہ کا وزارت خارجہ میں قائم کرائسز مینجمنٹ سیل کا دورہ

وزیرخارجہ مخدوم شاہ محمود قریشی کا مزید کہنا تھا کہ اجلاس میں متفقہ طور پر سامنے آنے والی  تجاویز کو نیشنل کوآرڈینیشن کمیٹی کے آئندہ اجلاس میں  منظوری کیلئے پیش کیا جائے گا۔

یاد رہے اس سے قبل وزیرخارجہ مخدوم شاہ محمود قریشی نے ایمرجنسی کرایسز مینجمنٹ سیل کے مختلف سیکشنز کا دورہ کیا، دورے کے موقع پر ڈی جی کرائسز مینجمنٹ سیل سلمان اطہر نے سیل کی کارکردگی کے حوالے سے وزیر خارجہ کو بریفنگ دی ۔

اس موقع پر وزیرخارجہ مخدوم شاہ محمود قریشی نے ایمرجینسی کرائسز مینجمنٹ سیل میں موصول ہونے والی شکایات کا جائزہ لیا۔

 وزیرخارجہ نے کہا تھا کہ دنیا بھر میں ایئرپورٹس پر وطن واپسی کے منتظر پاکستانیوں کی جلد واپسی کیلئے ہر ممکن کوشش کر رہے ہیں۔