وزیرِ اطلاعات پنجاب فیاض الحسن چوہان نے کہا ہے کہ عوام کے بھرپور تعاون سے ہی کورونا کو پھیلنے سے روکا جا سکتا ہے۔

وزیرِ اطلاعات پنجاب فیاض الحسن چوہان نے اپنے ایک بیان میں کہا کہ عوام کو موجودہ کاروباری اوقاتِ کار کے دوران سماجی دوری کے ضابطوں کا خیال رکھنا چاہیئے، وزیرِ اعلیٰ پنجاب سردار عثمان بزدار نے لاک ڈاؤن میں غریب عوام کی سہولت کو مدِنظر رکھا ہے ۔

اپنے بیان میں وزیرِ اطلاعات پنجاب نے کہا کہ گلی محلوں میں پھیری لگانے والے پھل و سبزی فروش اور ریڑھی بان لاک ڈاؤن سے مستثنیٰ ہیں۔

 فیاض الحسن چوہان نے یہ بھی کہا کہ لاک ڈاؤن میں ہر طبقہ اور کاروبار کو عوامی ضرورت کے مطابق کھولنے کی اجازت دی گئی ہے، بیکریز، کریانہ سٹور، ڈیپارٹمنٹل سٹور، سپر مارکیٹس، بیج، کھاد، فرٹیلائزرز اور آٹو ورکشاپس صبح 9 سے شام 5 بجے تک کھلی رہیں گی۔

وزیراعظم کو چھوٹا آدمی کہنا قابلِ مذمت ہے، فیاض الحسن چوہان

فیاض الحسن چوہان کا کہنا تھا کہ اسی طرح پولٹری، مچھلی، گوشت اور دودھ کی دوکانوں پر  بھی صبح 9 سے شام 5 بجے تک کے اوقاتِ کار لاگو ہوں گے، سپیئر پارٹس، ورکشاپس، پٹرول پمپس، فارمیسیز، پھل و سبزی کی دکانیں شام 8 بجے کے بعد بھی کھلی رہ سکتی ہیں جبکہ آٹا چکیوں، پوسٹل سروسز، تمام طبی سہولیات، تندوروں اور ہوم ڈیلیوری سروسز کو بھی شام 8 بجے کے بعد کھلا رہنے کی اجازت دی گئی ہے۔

وزیرِ اطلاعات پنجاب فیاض الحسن چوہان کا مزید کہنا تھا کہ رمضان المبارک میں عوام کی سہولت کے لیے دودھ، کریانہ سٹور اور تندور صبح 2 سے 04:15 تک کھلے رہیں گے۔