ملک بھر میں کورونا وائرس نے خطرے کی گھنٹی بجادی، خواتین ڈاکٹرز نے موجودہ صورتحال پر آبدیدہ  ہوکر عوام کے آگے ہاتھ جوڑ لیے۔

کراچی پریس کلب میں  کورونا وائرس کے حوالے سے خواتین ڈاکٹرز عوام سے ہاتھ جوڑ کے احتیاط کی اپیل کرتے ہوئے آبدیدہ ہوگئیں۔

فرنٹ لائن پر وائرس سے لڑنے والی خواتین ڈاکٹرز  نے  کہا کہ  ملک میں کورونا وائرس پھیل رہا ہے،عوام احتیاط نہیں کر رہی ۔سماجی دوری پر بالکل بھی عمل نہیں ہورہا، خدارا  لوگ گھروں پر رہیں۔

ڈاکٹرز نے مزید کہا کہ  ہم ڈاکٹرز بھی اس مرض کا شکار ہوکر مر رہے ہیں  ،ایسے میں ہم مریضوں کی زندگی نہیں بچا سکتے۔اس نازک صورت حال میں ہمارے اہل خانہ ہمیں پیشہ چھوڑنے کے  لیے دباؤ بڑھا رہے ہیں۔

ان کا کہنا تھا کہ معاملات ہمارے ہاتھ سے نکلتے جارہے ہیں، خدا را عوام احتیاط کریں اور حکومتی درخواستوں پر سنجیدہ ہو جائیں ،ورنہ ہمارا نظام صحت تباہ ہوجائے گا۔

خواتین ڈاکٹرز کا کہنا تھا ہم خواتین  کو ایک نہیں تین تین محازوں پر لڑنا پڑرہا ہے۔ایک طرف مریض، دوسری طرف ہم خود اور تیسری طرف ہمارا خاندان بھی ہے ۔

انہوں نے کہا کہ ہمارے پاس حفاظتی کٹس نہیں ہیں ہمارے گھر والے ہم پر دباؤ بڑھا رہے ہیں  کہ نوکری چھوڑ دو۔ایسی صورت حال میں لوگوں کو مرتا نہیں دیکھ سکتے۔

خواتین ڈاکٹرز کا کہنا تھا کورونا وائرس سے  دوران حمل بھی ماں اور بچوں کو بھی خطرہ ہے ۔حکومت لاک ڈاؤن کو مزید سخت کرے تاکہ صورت حال مزید سنگین نہ ہوسکے۔