پاکستان میں پھنسے جرمن اور برطانوی شہریوں  کو ان کے وطن پہنچانے کے لیے خصوصی پروازیں روانہ ہوگئیں۔

تفصیلات کے مطابق  جرمنی کے پاکستان میں پھنسے شہریوں  کو خصوصی پرواز  سے ان کے وطن روانہ کردیا گیا۔

حکومت سے خصوصی پرواز کی اجازت ملنے کے بعد کراچی ایئر پورٹ سے جرمنی کے 82 شہریوں کو قطر ائیر ویز کی پرواز سے جرمنی کے لیے روانہ کردیا گیا۔

اس موقع پر سول ایوی ایشن اتھارٹی کراچی ایئرپورٹ منیجر محمد عمران خان ،ڈیوٹی ٹرمینل منیجر محمد نصرت نے جرمن قونصلیٹ کے ہمراہ خصوصی طور موجودتھے۔

دوسری جانب  پی آئی اے کی دو خصوصی پروازیں برطانوی شہریوں کو  لے کر مانچیسٹر اور لندن روانہ  ہوئیں۔

پی آئی اے ترجمان کے مطابق حکومتی اجازت کے بعد پی آئی اے نے برطانیہ کے لیے بھی خصوصی جزوی آپریشن بحال کردیا ہے۔ آج چار اپریل کو پی آئی اے کی دو پروازیں برطانیہ روانہ ہوئی ہیں۔

 ترجمان پی آئی اے نے بول نیوز کو بتایا کہ اسلام آباد ایرپورٹ سے مانچیسٹر کے لیے پرواز پی کے 9071 جبکہ لندن کے لیے پی کے 9785 برطانوی شہریوں کو  لے کر روانہ ہوئی ہے۔

ترجمان پی آئی اے کے مطابق حکومت نے پی آئی اے کو خصوصی طور پر جزوی آپریشن کی اجازت دی تھی۔کینیڈا کے بعد برطانیہ کے لیے پی آئی اے کا فضائی آپریشن آج سے شروع ہوا ہے۔