ترجمان دفتر خارجہ عائشہ فاروقی نے لائن آف کنٹرول پر بھارتی فورسز کی جانب سے جنگ بندی معاہدے کی خلاف ورزی پر بھارتی ناظم الامور کو دفترخارجہ طلب کرلیا ہے۔

تفصیلات کے مطابق ترجمان دفتر خارجہ عائشہ فاروقی نے اپنے ایک بیان میں کہا ہے کہ گورو اہلو والیا کو ڈی جی جنوبی ایشیاء و سارک زاہد حفیظ چوہدری نے طلب کیا جبکہ پاکستان کی جانب سے بھارتی سینیئر سفارتکار کو خلاف ورزی پر احتجاج ریکارڈ کرایا گیا۔

عائشہ فاروق نے کہا کہ 27 اپریل کو ایل او سی کے  جندروٹ اور کھوئی رٹہ سیکٹروں پر بھارتی قابض افواج کی جانب سے جنگ بندی کی خلاف ورزی کرتے ہوئے بلااشتعال فائرنگ و گولہ باری کر کے شہری آبادی کو نشانہ بنایا تھا۔

ترجمان دفتر خارجہ نے یہ بھی کہا کہ بھارتی قابض افواج کی جندروٹ سیکٹر میں بلا اشتعال گولہ باری و فائرنگ سے 36 سالہ یاسمین شیراز بیوہ شیراز شہید ہوئی جبکہ جبکہ کھوئی رٹہ سیکٹر میں ہی 9 سالہ  عتیبہ ظہیر ولد ظہیر احمد شدید ذخمی ہوئی۔

بھارتی فورسز کی لائن آف کنٹرول پر اشتعال انگیزیاں ، خاتون شہید

عائشہ فاروقی کا کہنا کہ بھارتی فورسز ایل او سی پر مسلسل معصوم شہریوں کو نشانہ بنا رہی ہیں، رواں برس بھارت کی جانب سے ابھی تک 882 جنگ بندی کی خلاف ورزیاں ہو چکی ہیں۔

ترجمان دفتر خارجہ عائشہ فاروقی کا مزید کہا کہ بھارت ایسی حرکتوں سے مقبوضہ کشمیر سے دنیا کی توجہ نہیں ہٹا سکتا،جبکہ بھارت کی اشتعال انگزیزی خطے میں امن و سلامتی کے لیے خطرہ ہے۔

واضح رہے کہ اس قبل پاک فوج کے شعبہ تعلقاتِ عامہ (آئی ایس پی آر) کے مطابق بھارتی فورسز نے صبح ایل او سی پر فائر بندی کی شدید خلاف ورزی کرتے ہوئے جندروٹ، کھوئی رٹہ سیکٹرز میں جان بوجھ کر شہری آبادی کو نشانہ بنایا۔

ترجمان آئی ایس پی آر کا کہنا ہے کہ بھارتی فورسز نے لائن آف کنٹرول پر اشتعال انگیزیاں کے دوران خودکار ہتھیاروں اور را کٹس کا استعمال کیا۔

ترجمان آئی ایس پی آر کا یہ بھی کہنا ہے کہ بھارتی فورسز کی بلااشتعال فائرنگ کے نتیجے میں گاؤں رید کی 36 سالہ خاتون یاسمین شہید جبکہ گاؤں موہڑہ چھتر کی عطیبہ ظاہر شدید زخمی ہوگئی۔