پاکستان کے دارالحکومت اسلام آ باد میں کورونا وائرس کی احتیاطی تدابیر اختیار کرتے ہوئے جزوی لاک ڈاؤن جاری ہے جہاں تمام مارکیٹیں ویران ہیں۔

تفصیلات کے مطابق کورونا وائرس کے باعث جڑواں شہروں میں جزوی لاک ڈاون جاری ہے تاہم بنیادی ضرورت کی اشیاء کی چند دکانیں کھلی ہیں جن میں کھانے پینے، لانڈری، کریانہ اور پرچون کی دکا نیں شامل ہیں۔

شہر اقتدار میں بھی لاک ڈاون کے دوران شہری حفاظتی تدابیر استعمال کرتے ہوئے دکھائی نہیں دے رہے جبکہ اسلام آباد کی مین سڑکوں پر ٹریفک کا رش بھی ہے۔

کورونا وائرس کے مریضوں کی تعداد 14000 سے بڑھ گئی

دوسری طرف دارالحکومت اسلام آباد انتظامیہ نے گزشتہ روز کورونا وبا کے خدشے کے پیش نظر لگائے گئے لاک ڈاوَن میں کچھ نرمی کا اعلان کردیا ہے۔

اسلام آباد انتظامیہ کی جانب سے جاری نوٹیفکیشن کے مطابق وفاقی دارالحکومت میں تفریحی مقامات اور پارکس کھولنے کا فیصلہ کیا گیا ہے، انتظامیہ کی جانب سے جاری نوٹیفکیشن کے مطابق کھیلوں کے گراوَنڈز پرپابندی برقرار رہے گی۔

یاد رہے کہ ملک بھر میں کورونا وائرس میں مبتلا مریضوں کی تعداد میں روزبا روز اضافہ ہورہا ہے جبکہ اسی طرح اموات کی شرح  میں بھی اسی نوعیت سے اضافہ ہورہا ہے اور اب تک 301 اموات واقع ہوچکی ہیں۔

آج کی بتاریخ 28 اپریل کے مطابق ملک بھر میں کورونا وائرس کے باعث 8 نئی اموات دیکھنے میں آئی ہیں جس کے بعد کل تعداد 301 ہوگئی ہے۔

یاد رہے اس سے قبل  ترجمان محکمہ صحت سندھ کے جاری اعداد و شمار کے مطابق سندھ بھر میں چوبیس گھنٹوں کے دوران 341 افراد میں کورونا وائرس کی تصدیق ہوئی جس کے بعد سندھ بھر میں کورونا متاثرین کی تعداد 4956 ہوگئی ہے۔

دوسری جانب بلوچستان میں 72 افراد میں کوروناوائرس کی تصدیق ہو ئی جس کے بعد صوبے بھر میں کوروناوائرس کے کل کیسز کی تعداد 853 ہوگئی ہے جبکہ محکمہ اطلاعات خیبرپختونخوا نے اپنے ایک بیان میں کہا کہ خیبرپختونخوا میں 120 افراد میں کوروناوائرس کی تصدیق ہو ئی جس کے بعد صوبے بھر میں میں کوروناوائرس کے کل کیسز کی تعداد 1984 ہوگئی ہے ۔