حکومت  پاکستان نے نیا نیب آرڈیننس لانے کا فیصلہ  کرلیا ہے۔

ذرائع وزارت قانون کے مطابق حکومت  پاکستان نے نیا نیب آرڈیننس لانے کا فیصلہ  کرلیا ہے،  وزارت قانون نے نیب ترمیمی آرڈیننس کی تیاری پر کام  بھی شروع کر دیا  ہے۔

وزارت قانون کے ذرائع کا کہنا ہے کہ  نئے آرڈیننس میں کئی شقوں میں ترامیم کی جارہی ہیں، گزشتہ آرڈیننس ختم ہونے کے بعد نیب کا دائرہ اختیار ماضی کی طرح بحال ہو گیا ہے۔

ذرائع وزارت خزانہ کا کہنا ہے کہ وفاقی حکومت  نے نیب قانون میں بڑی تبدیلی کا فیصلہ  کرتے ہوئے نیب عدالتوں کو کرپشن کے ملزمان کی ضمانت کا اختیار دینے کا فیصلہ کیا ہے۔

چیئرمین نیب کے وارنٹ گرفتاری جاری کرنے کا اختیار ختم کرنے پر  بھی غور کیا جارہا ہے۔

رضاکارانہ طور پر رقم واپسی پر بھی پانچ سال تک نا اہلی برقرار  رہے گی ۔

ذرائع کا کہنا ہے کہ اس حوالے سے وزیر قانون فروغ نسیم کو سیاسی جماعتوں کو اعتماد میں لینے کی ہدایت کی گئی ہے ۔

سیاسی جماعتوں سے رابطوں کےلیے کمیٹی تشکیل دےدی گئی ہے جس میں  اسد عمر اور پرویز خٹک بھی شامل ہیں۔حکومتی ٹیم اپوزیشن جماعتوں سے بھی مشاورت کرے گی۔

ذرائع کا مزید کہنا ہے کہ حکومتی ٹیم کا مسلم لیگ ن سے بھی رابطہ ہے۔ مسلم لیگ ن نے نیب آرڈیننس میں ترمیم کے لیے کچھ اپنی تجاویز کمیٹی کے حوالے کی ہیں۔