وزیرخارجہ مخدوم شاہ محمود قریشی نے کہا ہے کہ چین نے ایک بار پھر دنیا کو دکھایا ہے کہ وہ پاکستان کے مثالی دوست اور آئرن برادر ہیں اور وہ  مشکل وقت میں پاکستان کے ساتھ تعاون اور ہم آہنگی کے لیے دستیاب ہیں۔

تفصیلات کے مطابق پاکستان میں تعینات چین کے سفیر یاؤ جنگ کی وزارت خارجہ میں وزیرخارجہ مخدوم شاہ محمود قریشی سے ملاقات ہوئی،جس میں کرونا وبائی صورتحال اور اس سے نبرد آزما ہونے کیلئے کی جانے والی کاوشوں کے حوالے سے تبادلہ ء خیال کیا۔

اس موقع پر چینی سفیر نے کورونا وبا کے پھیلاؤ کو روکنے کے حوالے سے پاکستان کی طرف سے کی جانے والی سنجیدہ کاوشوں کو سراہا جبکہ کرونا وبا سے موثر انداز میں نمٹنے کیلئے پاکستان پریپیرڈنس اینڈ رسپانس پلان مرتب کرنے پر وزیر خارجہ کو مبارکباد دی۔

وزیر خارجہ نے کرونا وائرس پر قابو پانے کے لیے پاکستان کی بروقت مدد کرنے پر چینی حکومت کا شکریہ ادا کیا۔

شاہ محمود قریشی نے کہا کہ چینی ماہرین صحت کی ٹیم کے پاکستان آمد  سے، ہمیں کرونا وبا سے نمٹنے کیلئے چین کے تجربات سے استفادہ حاصل کرنے کا موقع میسر آیا ۔

   وزیرخارجہ نے یہ بھی کہا کہ چین نے نہ صرف اپنے ملک میں وائرس کو بہت اچھے طریقے سے کنٹرول کیا بلکہ باقی ممالک کو بھی اس وبا کو کنٹرول کرنے کے لیے معاونت فراہم کی ۔

شاہ محمود قریشی کا کہنا تھا کہ پاک چین اقتصادی راہداری نہ  صرف دونوں ممالک کیلئے بلکہ پورے خطے کی تعمیر و ترقی کیلئے انتہائی اہمیت کا حامل ہے۔

وزیرخارجہ مخدوم شاہ محمود قریشی کا مزید کہنا تھا پاک چین اقتصادی راہداری کے دوسرے مرحلے کی جلد تکمیل ہماری اولین ترجیحات میں شامل ہے جبکہ سی پیک کے دوسرے مرحلے کی تکمیل سے صنعت، صحت، زراعت اور معاشی ترقی کے بہت سے شعبوں میں  دو طرفہ تعاون کو مزید فروغ ملے گا۔

ملاقات میں چینی سفیر نے صدر پاکستان ڈاکٹر عارف علوی اور وزیر خارجہ کے حالیہ دورہ ء چین کا حوالہ دیتے ہوئے اس مشکل گھڑی میں چینی حکومت اور عوام کے ساتھ اظہار یکجہتی کرنے پر وزیر خارجہ کا خصوصی شکریہ ادا کیا۔