سول ایوی ایشن اتھارٹی ( سی اے اے ) نے فلائیٹ آپریشن 21 اپریل تک معطل کرنے کا نوٹی فیکیشن جاری کردیا۔

تفصیلات کے مطابق ترجمان سول ایوی ایشن نے اپنے ایک بیان میں کہا کہ سی اے اے کی جانب سے 10 اپریل سے 21 اپریل تک پاکستان میں فضائی آپریشنُ معطل رہے گا۔

ترجمان سول ایوی ایشن نے مزید کہا کہ فضائی آپریشنُ معطل کرنے کے حوالے سے سی اے اے نے پاکستان میں کام کرنے والی تمام فضائی کمپنیوں کا آگاہ کردیا ہے۔

دوسری جانب سول ایوی ایشن اتھارٹی نے کراچی ایرپورٹ پر بیک اپ پلان کے تحت کنٹنجنسی ایرٹریفک کنٹرول روم قائم کرلیا۔

 ترجمان وزارت ہوا بازی نے کہا کہ کنٹرول بیک اپ سسٹم کے طور کام کرے گا جبکہ ایئر ٹریفک کا مین کنٹرول روم کبھی بند ہو جائے تو بیک اپ کے طور کنٹنجنسی ایرٹریفک کنٹرول روم کام کرےگا۔

 ترجمان وزارت ہوا بازی نے مزید کہا کہ کنٹنجنسی کنٹرول روم ہوابازی کے شعبے کو بغیر کسی وقفے کے سروسز مہیا کرنے کے لیے بنایا ہے تاکہ اگر مین کنٹرول روم اگر کسی وجہ سے بند ہو جائے تو آدھے گھنٹے کے اندر کنٹنجنسی کنٹرول روم سے فوری ایر ٹریفک کو کنٹرول کیا جاسکے گا۔

یاد رہے کہ ملک میں بڑھتے ہوئے کورونا وائرس کے خطرات کی وجہ سے حکومت کی جانب سے فیصلہ کیا گیا تھا کہ ملک بھر میں تمام فضائی آپریشن دو ہفتوں کے لئے بند کر دیئے جائیں گے۔

پی آئی اے کی ایک اور ائیرہوسٹس میں کورونا وائرس کی تصدیق

وفاقی حکومت کی جانب سے یہ فیصلہ وزیراعظم عمران خان سے مشاورت کے بعد لیا گیا تھا جس کے بعد ملک بھر میں آئندہ دو ہفتوں کے لئے کسی بھی قسم کے فضائی آپریشن کی اجازت نہیں ہو گی۔

واضح رہے کہ دنیا بھر میں اب تک کورونا وائرس سے ہونے والی اموات  کی تعداد 88 ہزار سے تجاوز کرگئیں ہیں۔

 کورونا وائرس کی عالمی وباء دنیا کے 200 سے زائد ممالک میں پھیل چکی ہے جس میں 88،565افراد ہلاک جبکہ 15لاکھ 21ہزار  سے زائد افراد متاثر ہیں۔

دوسری جانب اس وائرس کو شکست دے کر صحت یاب ہونے والے مریضوں کی تعداد 3لاکھ 31ہزار سے زائد ہے۔

اس مہلک وائرس کے سب سے زیادہ مصدقہ مریض امریکہ میں ہیں جہاں 4 لاکھ 35ہزار سے زائد افراد متاثر ہیں جبکہ مرنے والوں کی تعداد 15ہزار کے قریب پہنچ گئی ہے۔