وزیر خارجہ شاہ محمود قریشی کی جانب سے اپنے ایرانی ہم منصب جواد ظریف کو رمضان المقدس کی مبارک باد دی گئی ہے۔

تفصیلات کے مطابق وزیر خارجہ مخدوم شاہ محمود قریشی کا ایرانی ہم منصب جواد ظریف کے ساتھ ٹیلیفونک رابطہ ہوا ہے جس میں دونوں وزرائے خارجہ کے مابین علاقائی صورتحال اور کرونا وبا ء سے نمٹنے کے حوالے سے مختلف پہلوؤں پر تبادلہ خیال کیا گیا ہے۔

وزیر خارجہ کی جانب سے ایران میں کرونا وائرس سے ہونے والے کثیر جانی نقصان پر گہرے دکھ اور افسوس کا اظہار کرتے ہوئے ایرانی حکومت اور عوام کے ساتھ اظہار یکجہتی کیا گیا ہے۔

وزیر خارجہ شاہ محمود قریشی نے کہا ہے کہ ایران کی حکومت اور عوام جس بہادری سے اس عالمی وبا ء کا مقابلہ کر رہے ہیں وہ یقیناً قابل تحسین ہے۔

دونوں وزرائے خارجہ کے مابین افغان امن عمل سمیت علاقائی صورتحال پر بھی تفصیلی گفتگو کی گئی تھی۔

وزیر خارجہ نے مقبوضہ جموں و کشمیر کے حوالے سے پاکستان کے موقف کی مسلسل تائید و حمایت پر ایرانی حکومت اور ایرانی وزیر خارجہ کا خصوصی شکریہ ادا کیا۔

مودی حکومت مقبوضہ کشمیر میں آبادی کا تناسب تبدیل کررہی ہے، وزیراعظم

دوسری جانب وزیر خارجہ مخدوم شاہ محمود قریشی کا نیوزی لینڈ کے وزیر خارجہ وینسٹن پیٹرز سے ٹیلیفونک رابطہ ہوا ہے جس میں پاکستانی وزیر خارجہ شاہ محمود قریشی نے نیوزی لینڈ میں کورونا وائرس کے پھیلاؤ کو روکنے کے لئے نیوزی لینڈ حکومت کی جانب سے اٹھائے گئے بروقت اقدامات کو خوب سراہا ہے۔

دورانِ گفتگو کورونا عالمی وبائی چیلنج سمیت دو طرفہ باہمی دلچسپی کے امور پر تبادلہ خیال کیا گیا جبکہ مخدوم شاہ محمود قریشی نے بتایا کہ پاکستان، نیوزی لینڈ کے ساتھ اپنے دو طرفہ تعلقات کو انتہائی قدر کی نگاہ سے دیکھتا ہے ۔

انہوں نے کہا کہ اس غیر معمولی عالمی وبائی چیلنج سے نبرد آزما ہونے کیلئے مشترکہ کاوشیں بروئے کار لانے کی ضرورت ہے اور بتایا کہ  کرونا وبا کے غیر معمولی پھیلاؤ کے باعث دنیا عالمی معاشی بحران کی جانب بڑھ رہی ہے۔