وزیراعظم کے معاون خصوصی ڈاکٹر ظفر مرزا نے کہا ہے کہ آنے والے دنوں میں کورونا وائرس کے کیسز میں مزید اضافہ ہوگا۔

تفصیلات کے مطابق وزیراعظم کے معاون خصوصی برائے صحت ڈاکٹر ظفر مرزا نے کہا ہے کہ پاکستان میں اس وقت الارمنگ صورتحال ہے کیونکہ گذشتہ چوبیس گھنٹوں میں کورونا  وائرس کے مریضوں میں تشویشناک اضافہ ہوا ہے۔

انہوں نے کہا کہ پاکستان میں کورونا ٹیسٹ 5 لاکھ 20  ہزارسے تجاوز کر چکے ہیں جس کے بعد کورونا کیسز میں مزید اضافہ ہوگیا جبکہ 64 ہزار کنفرم کیسز بھی ہیں۔

انہوں نے بتایا کہ گزشتہ 24 گھنٹے میں 2636 کورونا کیسز رپورٹ ہوئے ہیں لیکن اس کے ساتھ ساتھ پاکستان میں کورونا کیسز اور اموات میں تیزی سے اضافہ بھی ہورہا ہے۔

انہوں نے بتایا کہ ملک بھر میں 157 لوگ وینٹی لیٹرز پر ہیں اور وینٹی لیٹرپر وہی مریض جاتے ہیں جن کے پھیپھڑے کام کرنا چھوڑ جاتے ہیں اور اب وینٹی لیٹرز پر بھی مریضوں کی تعداد میں اضافہ ہورہا ہے۔

ڈاکٹر ظفر مرزا نے پریس کانفرنس میں بتایا کہ گزشتہ 24 گھنٹوں میں سب سے زیادہ 57 مریض جاں بحق ہوئے جبکہ اس سے پہلے ایک دن میں اتنی اموات اور کیسسز رپورٹ نہیں ہوئے ہیں۔

انہوں نے کہا کہ اسپتالوں کی صورتحال سے متعلق سسٹم سے کل آگاہ کروں گا کیونکہ ایک ایسا سسٹم بنایا ہے جو ہسپتالوں کی صورتحال سے آگاہ رکھے۔

انصاف کے نظام پر عوام کا اعتماد بہت حد تک متزلزل ہوچکا ہے، وزیراعظم

ان کا کہنا تھا کہ احتیاطی تدابیر کے ساتھ اسلامی طریقہ کار کے ساتھ میت کو غسل کفن اور دفن کیا جا سکتا ہے

یاد رہے کہ ملک بھر میں آج کورونا سے مزید 51 افراد جاں بحق ہوگئے جس کے بعد اموات کی مجموعی تعداد 1334 ہوگئی جب کہ نئے کیسز رپورٹ ہونے کے بعد مریضوں کی تعداد 64028 تک جاپہنچی ہے ۔

خیبرپختونخوا میں  کورونا سے سب سے زیادہ اموات سامنے آئی ہیں جہاں کورونا سے 432 افراد انتقال کرچکے ہیں جب کہ سندھ میں 396 اور پنجاب میں 410 افراد جان کی بازی ہار گئے۔

حکومتی اعداد وشمار کے مطابق بلوچستان میں 60 ، اسلام آباد 22، گلگت بلتستان میں 9 اور آزاد کشمیر میں مہلک وائرس سے 5 افراد چل بسے۔

آج بروز جمعہ ملک بھر سے اب تک کورونا کے مزید 1332 کیسز  اور 51 ہلاکتیں سامنے آئی ہیں جن میں پنجاب سے 927 کیسز 29 ہلاکتیں، بلوچستان 312 کیسز 19 ہلاکتیں،  اسلام آباد 85 کیسز 3 ہلاکتیں اور آزادکشمیر سے 8 کیسز رپورٹ ہوئے ہیں۔