مشیر اطلاعات خیبرپختونخوا اجمل وزیر نے کہا ہے کہ لیڈر وہ ہوتا ہے جو فرنٹ لائن پر ہوتا ہے ، وزیراعظم عمران خان اور ان کی ٹیم اس وقت فرنٹ لائن پر ہے ۔

مشیر اطلاعات خیبرپختونخوا اجمل وزیر نے  پریس کانفرس کرتے ہوئے کہا کہ خیبرپختونخوا حکومت نے عید سادگی سے منانے کا فیصلہ کیا  جبکہ طیارہ حادثہ کے باعث  عید پر مکمل سادگی اخیتار کی گئی۔

اجمل وزیر  نے کہا کہ چیف سیکرٹری ، وزراء اور میڈیا  کے ساتھی  بھی کورونا وائرس سے متاثر ہوئے  اس لئے ہم  اپنی جانوں کی پرواہ کیے بغیر کام کر رہے ہیں  جبکہ آستینیں چڑھا اور ہیٹ پہن کرشوبازیاں کرنے والے ڈرائینگ روم میں نظر آ رہے ہیں

پریس کانفرنس کرتے ہوئے مشیر اطلاعات کے پی اجمل وزیر نے یہ بھی کہا کہ خیبرپختونخوا میں سیاحتی مقامات بند ہیں عوام وہاں جانے سے گریز کریں  کیونکہ عوام نے احتیاط نہ کی تو کورونا وباء مزیز بڑھ سکتی ہے

لاک ڈاؤن دوبارہ ہوگا یا نہیں؟

مشیراطلاعات خیبرپختونخوا اجمل وزیر نے مزید کہا کہ کرفیو کی تجویز زیر غور نہیں ، عوام نے حکومت کے ایس او پیز پر عمل نہ کیا تو سخت اقدامات کرنا پڑیں گے ۔

واضح رہے کہ کورونا وائرس کے باعث ملک بھر میں آج عید الفطر کا دوسرا روز بھی سادگی کے ساتھ منایا جا رہا ہے۔

حکومت پاکستان، علمائے کرام ، سیاستدانوں اور سماجی شخصیات کی جانب سے بھی کورونا وائرس اور پی آئی اے طیارہ حادثے کے پیش نظر عوام سے عید سادگی کے ساتھ منانے کی درخواست کی گئی ہے۔