واپڈا نے دیا مربھاشا ڈیم پراجیکٹ مین ڈیم کی تعمیر کے لئے 442 ارب روپے کا کنٹریکٹ ایوارڈ کر دیا۔

تفصیلات کے مطابق دیا مربھاشا ڈیم پراجیکٹ کی تعمیر کے لیے واپڈا نے پاور چائنا اور فرنٹیئر ورکس آرگنائزیشن (ایف ڈبلیو او) پر مشتمل جوائنٹ ونچر کے ساتھ ایک معاہدے پر دستخط کر دیئے۔

کنٹریکٹ پاور چائنا اور ایف ڈبلیو او  پر مشتمل جوائنٹ ونچر کو ایوارڈ کیا گیا ہے جبکہ کنٹریکٹ میں ڈائی ورشن سسٹم، مین ڈیم، پُل اور تانگیرپن بجلی گھر کی تعمیر شامل ہے ۔

دیا مربھاشا ڈیم کے کنٹریکٹ ایوارڈ کی تقریب سے خطاب کرتے ہوئے وفاقی وزیر برائے آبی وسائل محمد فیصل واوڈا نے کہا کہ دیا مر بھاشا ڈیم پاکستان کی واٹر، فوڈ اور انرجی سیکورٹی کے لئے اہم منصوبہ ہے، ہماری حکومت نے ایک سال میں مہمند اور دیا مر بھاشا جیسے دو بڑے ڈیمز پرکام شروع کیا جس کی نظیر نہیں ملتی۔

وفاقی وزیر برائے آبی وسائل نے کہا کہ دیا مر بھاشا ڈیم پر لاگت کا تخمینہ 1406.5  ارب روپے ہے، 2028 ء میں مکمل ہوگا جبکہ دیا مر بھاشا ڈیم میں پانی ذخیرہ کرنے کی مجموعی صلاحیت 8.1ملین ایکڑ فٹ ہوگی۔

محمد فیصل واوڈا نے یہ بھی کہا کہ بجلی پیدا کرنے کی صلاحت 4500 میگاواٹ، نیشنل گرڈ کو سالانہ 18  ارب یونٹ بجلی حاصل ہوگی۔

وفاقی وزیر برائے آبی وسائل محمد فیصل واوڈا نے مزید کہ امید ہے کہ ہم وقت سے پہلے دیامر بھاشا ڈیم کی تکمیل کریں گے،پاکستان کی ترقی کے لئے آبی وسائل کے منصوبوں کی تکمیل جلد یقینی بنائیں گے۔

معاہدے پر دستخط کی تقریب میں آبی وسائل کے وفاقی وزیر، چینی سفیر، وفاقی سیکریٹری، چیئرمین واپڈا، انجینئرانچیف پاکستان آرمی اور ڈی جی ایف ڈبلیو او بھی موجود تھے۔

قبل ازیں دیا مر بھاشا ڈیم کے لئے کنسلٹنسی سروسز کا کنٹریکٹ بھی ایوارڈ کیا جاچکا ہے،27  ارب 18 کروڑ روپے مالیتی کنسلٹنسی کنٹریکٹ دیا مر بھاشاکنسلٹنٹس گروپ کو ایوارڈ کیا گیا ہے۔