گورنر پنجاب چوہدری سرور نے کہا ہے کہ دنیا کا کوئی ملک بھی لاک ڈاون کو زیادہ دیر برداشت نہیں کر سکتا اور اگر لاک ڈاؤن کو لمبا کریں گے تو بہت سے لوگ غربت کی وجہ سے موت کی طرف جائیں گے۔

تفصیلات کے مطابق گورنر پنجاب چوہدری محمد سرور نے پیرمحل آمد واٹر فلٹریشن پلانٹ کا افتتاح کیا اور کہا کہ ضلع پھر کے پانچویں فلٹریشن پلانٹ کا افتتاح کیا ہے  ۔

 گورنر پنجاب نے کہا کہ وزیر اعظم عمران خان، چیف منسٹر ،وزیر اعلیٰ اور ہم مل کر مسائل حل کررہے ہیں ہمیں اب بھی احتیاط سے کام لینا ہوگا۔

  چوہدری سرور نے اپنے ایک بیان میں یہ بھی کہا کہ حکومت نے لاک ڈاون میں نرمی کی ہے لیکن نرمی کا ہرگز یہ مطلب نہیں کہ کرونا وائرس کی وبا ختم ہوگئی ہے۔

گورنر پنجاب چوہدری سرور نے مزید کہا کہ ابھی تک ایسا کوئی پرپوزل نہیں آٰیا کہ لاک ڈاون سخت کیا جائے، بڑے بڑے ملکوں نے کوویٹ 19 کے سامنے گھٹنے ٹیک دئیے ہیں ہمیں بہت احتیاط سے کام لینا ہوگا۔

لاک ڈاؤن میں مزید نرمی کا فیصلہ

واضح رہے اس سے قبل پنجاب حکومت نے لاک ڈاون میں مزید نرمی کا فیصلہ کر لیا تھا۔

وزیراعلیٰ پنجاب سردار عثمان بزدار کی زیر صدات کابینہ کمیٹی برائے انسداد کورونا کے اجلاس میں کورونا وائرس کی وجہ سے پیدا ہونے والی صورتحال کا تفصیلی جائزہ لیا گیا جبکہ ایس او پیز کے مطابق مختلف اداروں کو کھولنے کے لئے وفاق کو سفارشات پیش کرنے پر اتفاق کرلیا گیا تھا۔

اجلاس میں وزیراعلی عثمان بزدار نے کہا تھا کہ وفاق سے 1500 وینٹی لیٹر فراہم کرنے کی درخواست کی جائے گی- ریسٹورنٹس،کیفے وغیرہ کھولنے سے متعلق وفاق کی ہدایات پر عمل کیاجائے گا۔