پاکستان پیپلز پارٹی کے چیئر مین بلاول بھٹو زرداری کا کہنا ہے کہ یوم مئی پیپلزپارٹی کے لیے  ہمیشہ اہم دن رہا ہے۔

 بلاول بھٹو زرداری کا پریس کانفرنس سے خطاب کرتے ہوئے کہنا تھا کہ  آج یکم مئی ہے ، یوم مئی پیپلزپارٹی کے لیے  ہمیشہ اہم دن رہا ہے۔

چیئر مین پاکستان پیپلز پارٹی نے کہا کہ اس سال کورونا کی وباء کی وجہ سے اس طریقے سے یکجہتی نہیں کر سکے اس لیے پریس کانفرنس کر رہے ہیں۔

بلاول بھٹو نے کہا کہ اس کورونا جنگ میں فرنٹ لائن پر ہمارے ڈاکٹر ہیں۔اس مہلک وائرس سے 400 تک ڈاکٹر ز، پیرا میڈیکل اسٹاف کے افراد متاثر ہوئے ہیں جبکہ 9 ڈاکٹر جاں بحق ہوچکے ہیں۔

انہوں نے کہا کہ ہم ڈاکٹروں کو سلام پیش کرتے ہیں۔حکومت پاکستان کو سلام بھی پیش کرنا چاہیے اور ساتھ میں ڈاکٹروں کے لیے عملی اقدامات کریں۔

چیئر مین پیپلز پارٹی نے کہا کہ ہمارے نزسز  اور ڈاکٹر زکو کیا چاہیے ۔صرف اتنا مطالبہ کر رہے ہیں کہ حکومت ان  کے تحفظ کے لیے اقدامات کرے۔

بلاول بھٹو نے مزید کہا کہ  جو کچھ مرضی کریں لیکن ڈاکٹروں کی حفاظت کے اقدامات کریں۔ کیا ہم یہ سوچ سکتے ہیں کہ فوج بارڈر پر جنگ لڑنے جائے اور ہم ان کو بندوق اور یونیفارم نہ دیں۔

انہوں نے کہا کہ  دو ماہ گزر چکے ہیں لیکن وزیر اعظم نے ڈیلی ویجرز کے ہاتھ میں ایک روپیہ بھی نہیں دیا۔ ڈیلی ویجرز کے  لیے 70 ارب رکھنے کا اعلان کیا گیا لیکن ایک روپیہ نہیں دیا گیا ۔

چیئر مین پیپلز پارٹی نے عوام سے درخواست کی کہ  جوبھی باہرنکلے وہ فیس ماسک پہنے۔ ہم جوبھی پھیلاؤ کوکم کرنے کےلیے کرسکتے ہیں کریں۔ رمضان میں ہمیں دوسرے لوگوں کے لیے  سوچنا چاہیئے۔