وزیرٹرانسپورٹ اویس شاہ نے کہا ہے کہ ہمیں عوام کی فکر ہے اور شیخ رشید کو ٹرین کی۔

تفصیلات کے مطابق وزیرٹرانسپورٹ اویس شاہ نے شیخ رشید کی پریس کانفرنس پر ردعمل دیتے ہوئے کہا کہ شیخ رشید صاحب کراچی میں فی الحال ٹرین نہیں  چلے گی۔

اپنے بیان میں وزیرٹرانسپورٹ نے کہا کہ کراچی سندھ کا بڑا شہر ہے یہاں ہر صوبے کی عوام بستی ہے ریلوے اسٹیشنز پر ہجوم بڑھ جائے گا۔

اویس شاہ نے یہ بھی کہا کہ شیخ رشید کو عوام کی زندگیو ں کی فکر کم اور ٹرین چلانے کی فکر زیادہ ہے لیکن اگر ٹرینں چلی تو پھر کورونا وائرس پر کنٹرول کرنا مشکل ہوجائے گا۔

وزیرٹرانسپورٹ اویس شاہ نے مزید کہا کہ شیخ صاحب آپ صوبے کے محتاج نہیں تو صوبے بھی آپ کے محتاج نہیں ہے، عید قریب ہے اگر ٹرینں چلیں تو پھر کورونا کے ایک لاکھ سے زائد کیسز ہوجائیں گے۔

ٹرینیں چلیں گی یا نہیں، منگل تک فیصلہ ہو جائے گا، شیخ رشید

واضح رہے اس سے قبل وفاقی وزیرِ ریلوے شیخ رشید احمد نے میڈیا سے بات کرتے ہو ئے کہا تھا کہ کراچی کا ٹریک کھلا تو ریلوے چلے گی، ریلوے صرف پنجاب کی نہیں پورے پاکستان کی ہے، منگل (19 مئی) تک ٹرین چلانے سے متعلق فیصلہ کر لیا جائے گا۔

وفاقی وزیرِ ریلوے نے کہا تھا کہ اگر ٹرینیں نہ چلیں تو پھر لوگوں سے ایڈوانس بکنگ میں لیے گئے 24 کروڑ روپے واپس کر دیں گے۔

انہوں نے مزید کہا تھا کہ ٹرینیں چلائی گئیں تو ایس او پیز پر مکمل طور پر عمل کیا جائے گا، محکمے نے اس حوالے سے تیاریاں مکمل کر رکھی ہیں،تمام چھوٹے اسٹیشن ختم کر دیئے، صرف 5 بڑے اسٹیشن رکھے گئے ہیں۔