وزیراعلی سردار عثمان بزدار نے اپنے خلاف من گھڑ ت الزامات اور تبصرہ کرنے پر سینئر صحافی اور تجزیہ کار حامد میر کو قانونی نوٹس بھجوادیا۔

لیگل نوٹس وزیراعلی پنجاب کے وکیل کی جانب سے بھیجا گیا جس میں کہا گیا ہے کہ حامد میر وزیر اعلی سے معافی مانگیں اور اگر  انھوں نے معافی نہ مانگی تو مزید قانونی چارہ جوئی ہو گی۔

نوٹس  میں کہا گیا کہ حامد میر نے نجی ٹی وی چینل کے پروگرام میں بغیر ثبوت  وزیر اعلی پنجاب سردار عثمان بزدار پر الزامات لگا کر صحافتی اقدار کو پامال کیا  جبکہ عثمان بزدار پر لگائے گئے الزامات بے بنیاد ہیں ۔

نوٹس میں مزید کہا گیا ہے کہ حامد میر نے چینی پر سبسڈی کے حوالے سے بھی الزامات لگائے لیکن سبسڈی صرف عثمان بزدار نے نہیں دی بلکہ قانون کے مطابق دیگر صوبوں نے بھی دی۔

اس موقع پر ایڈووکیٹ  عبیداللہ نے کہا کہ حامد میر نے میرے کلائنٹ عثمان بزدار پر گھٹیا اور بے ہودہ الزام عائد کئے، حامد میر بغیر ثبوت الزامات لگا کر میرے کلائنْت کی ہتک عزت کا مرتکب ہوا ہے۔

شوگر انکوائری رپورٹ پبلک کر دی گئی

  عبیداللہ ایڈووکیٹ نے مزید کہا کہ اندر معیاد چودہ یوم معافی نہ مانگنے کی صورت میں شہرت کو نقصان پہنچانے اورجھوٹے الزامات لگانے پر 25 کروڑ روپے ہرجانہ ادا کیا جائے ۔

یاد رہے کہ حامد میر نے ہم ٹی وی کے پروگرام میں اینکر محمد مالک سے گفتگو کرتے ہوئے کہا تھا کہ عثمان بزدار نے انکشاف کیا ہے کہ شوگر بحران میں جو سبسڈی دی گئی وہ مجھ سے عمران خان نے دلوائی میرے پاس اس کے ثبوت موجود ہیں۔