طیارے حادثے میں معجزانہ طور پر زندہ بچ جانے والے زخمی محمد زبیر کا سول اسپتال میں قانون نافذ کرنے والے اداروں نے بیان ریکارڈ کرلیا ہے۔

تفصیلات کے مطابق پی آئی اے کے کراچی میں حادثے کا شکار ہونے والے بدقسمت طیارے میں زندہ بچ جانے والے مسافر محمد زبیر  نے اپنے بیان میں کہا کہ طیارہ ایک دفعہ لینڈ کر گیا تھا پائلٹ نے دوبارہ فضا میں اڑایااور تقریباً پندرہ منٹ تک جہاز فضا میں اڑتا رہا لیکن چکر کاٹنےکےبعدجب پائلٹ نےدوبارہ لینڈنگ کرناچاہی تو انجن فیل ہوگئے۔

محمد زبیر   نے کہا کہ میری نشست اے ایٹ تھی، جہاز کے پائلٹ نے ایمرجنسی لینڈنگ کا مسافروں کو بتادیا تھا اور جیسے ہی جہاز کریش ہوا تو اندھیرا ہوگیا اور چیخ وپکار کی آوازیں گونجنے لگیں۔

حادثے میں  بچ جانے والے محمد زبیر نے مزید کہا کہ حادثے کے بعد ہر طرف آگ ہی آگ تھی ، ایک جانب روشنی نظر آئی تو میں اسی جانب گیا اور چھلانگ لگاکر جہازسے باہرنکل آیا۔

پی آئی اے طیارہ حادثےمیں 97لاشیں نکال لی گئیں،ڈی جی آئی ایس پی آر

واضح رہے کہ گزشتہ روز مسافروں کو لاہور سے کراچی لانے والا بدقسمت پی آئی اے کا طیارہ کراچی ایئر پورٹ پر لینڈنگ سے چند لمحے پہلے حادثے کا شکار ہوا، جس کے نتیجے میں 97 افراد جاں بحق ہوگئے۔

طیارہ حادثے میں عملے کے 7ارکان بھی شال تھے، افسوسناک واقعے میں بینک آف پنجاب کے صدر ظفر مسعوداور محمد زبیر حادثے میں معجزانہ طور پر محفوظ رہے۔

اس موقع پر پی آئی اے کے ترجمان عبداللہ خان کاکہنا تھا کہ حادثے میں شہید ہونے والوں کے جسد خاکی لواحقین کے حوالے کرنے کا عمل جاری ہے،لواحقین کو تدفین کے لیے پی آئی اے کے قوانین کے مطابق 5 لاکھ روپے ادا کیے جاتے ہیں۔

ترجمان کے مطابق وزیراعظم کی ہدایت پرحادثے میں شہید ہونے والوں کی تدفین کےلیےفی کس 10 لاکھ روپے ادا کرنے کا فیصلہ کیا گیا ہےجوکہ ڈسٹرکٹ منیجرز پی آئی اےخود لواحقین کے گھر جا کے ادا کریں گے۔