وزیراعلیٰ بلوچستان جام کمال خان نے کہا ہے کہ صحت کے نظام کو مستحکم بنانا اور اسے جدید خطوط پر استوار کرنا اولین ترجیح ہے ۔

وزیراعلیٰ بلوچستان جام کمال خان سے چئیرمین سینیٹ محمد صادق سنجرانی کی ملاقات ہوئی جس میں چئیرمین سینیٹ کی جانب سے وزیراعلیٰ بلوچستان کو عید کی مبارکباد دی  گئی جبکہ کورونا وائرس کی روک تھام سمیت دیگر امور پر تبادلہ خیال کیا گیا ۔

وزیراعلیٰ بلوچستان نے کہا کہ کورونا وائرس کی ٹیسٹنگ کی صلاحیت میں اضافہ کیا گیاہے ، صوبائی حکومت کورونا وائرس کے پھیلاؤ کی روک تھام کے ساتھ ساتھ فوڈ سیکیورٹی اور معاشی سرگرمیوں کے تحفظ کے لیۓ بھی اقدامات کر رہی ہے

جام کمال خان نے یہ بھی کہا کہ تفتان سے لیکر آج تک کی صورتحال میں حکومت بلوچستان نے زمہ دارانہ کردار ادا کیا، کورنا وائرس کی روک تھام اور دیگر متعلقہ امور پر صوبائ حکومت کے اقدامات قابل ستائیش ہیں۔

وزیراعلیٰ بلوچستان جام کمال خان نے مزید کہا کہ آئیندہ مالی سال کے بجٹ میں شعبہ صحت کی ترقی اور بہتری پر توجہ مرکوز رکھی جائے گی۔

لاک ڈاون سے لوگوں کا روزگار خطرے میں ہے، وزیراعلیٰ بلوچستان

واضح رہے کہ ملک میں آج اب تک کورونا سےہو نے والی اموات کی مجموعی تعداد 1169 ہو گئی ہے جبکہ نئے کیسز سامنے آنے کے بعد مریضوں کی تعداد 56792 تک پہنچ گئی ہے۔

تفصیلات کے مطابق اب تک سب سے زیادہ اموات خیبرپختونخوا میں سامنے آئی ہیں جہاں کورونا سے 398 افراد انتقال کرچکے ہیں جب کہ سندھ میں 369 اور پنجاب میں 337 افراد جاں بحق ہو چکے ہیں۔

اس کے علاوہ بلوچستان میں 40، اسلام آباد 16، گلگت بلتستان میں 7 اور آزاد کشمیر میں مہلک وائرس سے دو افراد جاں بحق ہو چکے ہیں۔