رواں سال وفاقی بجٹ میں  تین ہزار ارب روپے تک خسارے کا امکان ہے۔

 تفصیلات کے مطابق  رواں مالی سال 2020-2021 کا وفاقی بجٹ 12 جون کو پیش کیا جائے گا  ، جس میں  تین ہزار ارب روپے تک خسارے کا امکان ہے۔

ذرائع کا کہنا ہے کہ وفاقی بجٹ تجاویز 2 جون کو وفاقی کابینہ کے اجلاس میں پیش کی جائیں گی۔بجٹ تجاویز کی تیاریوں  میں تیزی آگئی ہے۔

وزیر اعظم عمران خان نے 12 جون سے قبل باقاعدگی کے ساتھ بجٹ بریفنگ لینے کا فیصلہ کیا ہے۔

ذرائع کا مزید کہنا ہے کہ    وفاقی حکومت نے آئندہ بجٹ کے مجموعی حجم میں 10 فیصد بڑھانے کا فیصلہ کیا ہے۔ آئندہ مالی سال میں ساڑھے سات ہزار ارب سے زیادہ کا وفاقی بجٹ پیش  کیے جانے کا امکان  ہے۔

بجٹ محصولات  کا ہدف ساڑھے  4100 سے 4500 ارب مقرر کیے جانے کا امکان  ہے۔

آئندہ مالی سال کے بجٹ میں سرکاری ملازمین کی تنخواہوں اور پنشن میں بھی 20 فی صد تک اضافے کا امکان ہے علاوہ ازیں ملازمین کو ملنے والے ایڈہاک ریلیف میں سے دو ایڈہاک ریلیف تنخواہوں میں ضم کئے جانے کی بھی توقع ہے۔

وفاقی ترقیاتی بجٹ 530 ارب روپے تک مختص کئے جانے کا امکان ہے جبکہ  ترقیاتی منصوبوں کے لیے پبلک پرائیویٹ پارٹنرشپ کے تحت  200  ارب سے زیادہ مختص کیے جانے کا امکان ہے۔

ذرائع کا کہنا ہے کہ کورونا سے نمٹنے  اور کاروباری طبقے کے ریلیف کے لیے 1 ہزار ارب  مختص کیے جانے کا امکان ہے جبکہ  تعمیراتی صنعت کو وفاقی بجٹ میں خصوصی مراعات دینے کا فیصلہ کیا جانے کا امکان ہے۔

آئندہ بجٹ میں بنیادی اشیائے خوردونوش پر ٹیکس کی شرح مزید کم ہوگی جبکہ  ادویات سے متعلق اشیاء پر بھی ٹیکس کی شرح میں کمی کا امکان ہے۔ وفاقی حکومت نے ہیلتھ بجٹ صوبوں سے مشاورت کے ساتھ تیار کرنے کا فیصلہ کیا ہے۔

رواں مالی سال وفاقی اور صوبائی صحت بجٹ میں خاطر خواہ اضافے کا امکان ہے۔ ملکی سلامتی کے پیش نظر دفاعی بجٹ میں بھی اضافہ کیا جائے گا ۔

آئندہ بجٹ میں بڑے گھروں  اور فارمز ہاوسز پر لگژری ٹیکس لگانے کا امکان ہے۔ 2 سے 4 کنال کے بڑے  گھر پر ایک لاکھ تا دو لاکھ لگژری ٹیکس لگنے کا امکان ہے۔

4 کنال سے بڑے فارم ہاؤس پر ٹیکس، اور انتقال فیس میں  بھی اضافے کا امکان ہے۔

بڑی گاڑیوں، قیمتی ٹائلز سمیت امپورٹڈ لگژری آئٹمز پر  بھی ٹیکس لگائے جانے کا امکان ہے ۔آئندہ بجٹ میں پر تعیش اشیاء پر ٹیکس میں اضافے کا بھی امکان۔160 امپورٹ آئٹمز پر دو فیصد ڈیوٹی لگانے کا بھی امکان ہے۔