ترجمان دفتر خارجہ عائشہ فاروقی نے کہا ہے کہ پاکستان خوشحال پرامن مستحکم اور جمہوری افغانستان کی حمایت جاری رکھے گا۔

تفصیلات کے مطابق ترجمان دفتر خارجہ عائشہ فاروقی نے اپنے ایک بیان میں کہا کہ پاکستان ہمیشہ سے پرامن افغانستان اور تمام افغان فریقین کے مابین سیاسی مفاہمت کا خواہاں ہے۔

عائشہ فاروقی نے کہا کہ خطے میں امن کے لیے افغانستان کے امن و استحکام سے وابستہ ہے فروری میں ہونے والا امریکہ طالبان امن معاہدہ اہم پیشرفت ہے۔

 ترجمان دفتر خارجہ نے یہ بھی کہا کہ امن معاہدہ انٹرا افغان مزاکرات کے لیے تاریخی موقع ہے پاکستان سمجھتا ہے کہ افغانستان میں امن کی خاطر تمام فریقین کو تشدد میں کمی لانا ہوگی۔

عائشہ فاروقی کا کہنا تھا کہ ان مشکل حالات کے خلاف افغان فریقین کو ایک جامع سیاسی حکمت عملی طے کرنا ہوگی۔

ترجمان دفتر خارجہ عائشہ فاروقی کا مزید کہنا تھا کہ افغان قوم درپیش چیلنجر کا مقابلہ جامع سیاسی حکمت عملی سے ہی کرسکتی ہے پاکستان خوشحال پرامن مستحکم اور جمہوری افغانستان کی حمایت جاری رکھے گا۔ْ

پاکستان نے دراندازی کے بھارتی الزامات کو مسترد کردیا

ترجمان دفترخارجہ عائشہ فاروق نے اپنے ایک بیان میں بھارت کی طرف سے پاکستان پر دراندازی کے بے بنیاد الزامات مسترد کرتے ہوئے کہا تھا کہ پاکستان پر نام نہاد لانچنگ پیڈز اور دراندازی کی کوششوں کے بھارتی الزامات جھوٹے اور من گھڑت ہیں ۔

اپنے بیان میں ترجمان دفترخارجہ نے کہا تھا کہ دراندازی کی کوششوں کے بھارتی الزامات پاکستان کے خلاف بھارتی پروپیگنڈہ کا حصہ ہیں ۔

 عائشہ فاروق نے یہ بھی کہا تھا کہ پاکستان ہمیشہ سے کہتا آیا ہے کہ بھارت یہ الزامات لگآ کر جموں کشمیر کی صورتحال سے دنیا کی توجہ ہٹانا چاہتا ہے،بھارت مقبوضہ کشمیر میں انسانی حقوق کی سنگین خلاف ورزیوں اور ریاستی دہشتگردی کا مرتکب ہے ۔