پاکستان میں نیدرلینڈز کے سفیر واوٹر پلومپ نے کہا ہے کہ آزادی صحافت انسانی حقوق کا سنگ میل ہے۔

 پاکستان میں نیدرلینڈز کے سفیر واوٹر پلومپ نے ویڈیو پیغام میں کہا کہ آزادی صحافت 2020کا دن مبارک ہو، یہ دراصل بنیادی انسانی آزادیوں اور انسانی حقوق کو تحفظ دیتی ہے۔

واوٹر پلومپ نے کہا کہ ہمیں اس وقت ایک آزاد صحافت کی ضرورت ماضی سے بڑھ کر ہے، میڈیا ورکرز کو آزادانہ طور پر بغیر کسی خوف کے رپورٹ کرنے کی آزادی ہونا چاہئے

پاکستان میں نیدرلینڈز کے سفیر واوٹر پلومپ نے مزید کہا کہ آپ آزادانہ صحافت اور سوچ کی اہمیت اور ضرورت منانے کے کیے ہمارے ساتھ شامل ہوں، میں آزادی صحافت کے لیے کھڑا ہوں اور ہمیشہ موجود رہوں گا۔

یاد رہے کہ آج  دنیا بھر میں آج 3 مئی کو آزادی صحافت کا عالمی دن منایا جا رہا ہے،آزادی صحافت کا عالمی دن منانے کا مقصد صحافت کی اہمیت، افادیت، صحافتی ذمہ داریوں پر روشنی ڈالنا ہے۔۔

عالمی یوم آزادیِ صحافت کا آغاز1991ء سے نمیبیا سے ہوا جبکہ 1993ء میں اقوام متحدہ کی جنرل اسمبلی نے 3 مئی کو یہ دن منانے کا اعلان کیا تھا جس کے بعد ہر سال دنیا بھر میں 3 مئی کو یومِ اذادی صحافت منایا جاتا ہے۔

اس دن تمام دنیا کی صحافتی برادری اس بات کا تجدید عہد کرتی ہے کہ کسی بھی پرتشدد عناصر یا ریاستی دباؤ کے بغیر آزاد سچی اور ذمہ دارانہ اطلاعات عوام تک پہنچنے کیلئے لڑتے رہیں گے ۔

 دنیا بھر میں آزادی صحافت کیلئے صحافیوں کی قربانیاں لازوال ہیں، پاکستان کا جائزہ لیا جائے تو یہاں بھی صحافی ایک طویل عرصے سے اپنی آزادی کیلئے قربانیاں دے رہے ہیں انکی قربانیوںکی ایک ناقابل فراموش تاریخ ہے۔

یونیسکو حکام کا آذادی صحافت کے عالمی دن پر صحافیوں کے ساتھ اظہار یکجہتی

 آج 3 مئی 2020 کو بھی یہ دن منانے کامقصد صرف یہی ہے کہ معاشرے کو یہ بات یاد دلائی جائے کہ عوام کو حقائق پر مبنی خبریں پہنچانے کے جرم میں کتنے ہی صحافی اس دنیا سے چلے گئے اور کئی یہیں دیوارزنداں ہیں ۔

 صحافت نے نئے انقلابات کو جنم دیا‘ کئی بار ایسے مواقع آئے کہ جب قلم کی طاقت سے خوفزدہ ہو کر اس پر پابندیاں لگا دی گئیں لیکن آفرین ہے صحافی برادری اورانکی عظمت کو کہ جس نے اپنی قربانیوں سے اپنی مقبولیت،اہمیت اورافادیت کو کم نہ ہونے دیا۔