وزیراعلیٰ پنجاب سردار عثمان بزدار نے کہا ہے کہ  اپوزیشن رہنماؤں کی ”کورونا سیاست“نہیں چلے گی۔

تفصیلات کے مطابق وزیراعلیٰ پنجاب سردار عثمان بزدار نے اپنے ایک بیان میں کہا کہ اپوزیشن نے پہلے سیاست کو کاروبار بنایا اور اب کورونا کو سیاست کی نذر کیا۔

 عثمان بزدار نے کہا  کہ 22 کروڑ عوام دوچہروں والے ان سیاست دانوں کی منفی سیاست سے متنفر ہو چکے ہیں اور پاکستانی قوم کورونا پر سیاست چمکانے والوں کو کبھی معاف نہیں کرے گی۔

وزیراعلیٰ پنجاب نے یہ بھی کہا کہ عوام کے سامنے بلند و بانگ دعویٰ کرنے والوں کی قلعی کھل چکی ہےجبکہ اپوزیشن رہنماؤں کا رویہ ”دوسروں کو نصیحت، خود میاں فصیحت“ کے مترادف ہے۔

سردار عثمان بزدار کا کہنا تھا کہ اپوزیشن جماعتوں نے غیر معمولی حالات میں بھی غیر ذمہ داری کا ثبوت دیا ہے جبکہ ہنگامی صورتحال کے باوجود اپوزیشن رہنماؤں نے ہر موقع پر سیاست چمکانے کی کوشش کی۔

وزیراعلیٰ پنجاب سردار عثمان بزدار کا یہ بھی کہنا تھا کہ حکومت کے دور اندیش اقدامات کے باعث صورتحال سے نمٹنے میں بہت مدد ملی جبکہ وقت نے ثابت کیا ہے کہ وزیراعظم عمران خان کی قیادت میں حکومت نے بروقت فیصلے کئے۔

بازاروں کے اوقات کار تبدیل

یاد رہے اس سے قبل پنجاب حکومت نےآج سے صوبے کی تمام مارکیٹوں، بازاروں اور شاپنگ مالز کے اوقات کار تبدیل کردیئے تھے۔

تفصیلات کے مطابق صوبے بھر میں مارکیٹیں اور شاپنگ مالز کھولنے کے اوقات کارآج سے دوبارہ صبح 9 سے شام 5 بجے تک کردیئے گئے جبکہ میڈیکل اسٹورز کو اس پابندی سے استثنیٰ حاصل ہوگا۔

وزیر اعلیٰ پنجاب عثمان بزادر نے اپنے ایک بیان میں کہا تھا کہ حکومت نے کورونا کا پھیلاؤ، لوگوں کو غربت اور بھوک سے بھی بچانا ہے، تنقید برائے تنقید کرنے والے عناصر زمینی حقائق سے لاعلم ہیں۔