صدر مملکت ڈاکٹر عارف علوی نے کہا ہےکہ ٹیکسٹائل یونیورسٹی ٹیکسٹائل مصنوعات کی ویلیو ایڈیشن اور اس میں تنوع لانے کیلئے ٹیکسٹائل کی صنعت کی مدد کیلئے اپنا کردار ادا کرے۔

تفصیلات کے مطابق صدر مملکت ڈاکٹر عارف علوی نے نیشنل ٹیکسٹائل یونیورسٹی فیصل آباد کے عہداداروں سے ملاقات کی ، جس میں یونیورسٹی کے ریکٹر نے معیاری تعلیم کی فراہمی کے سلسلہ میں یونیورسٹی کے کردار کے بارے میں صدر مملکت کو جامع بریفنگ دی۔

 انہوں نے بتایا کہ یونیورسٹی انڈر گریجویٹ اور پوسٹ گریجویٹ سطح پر ٹیکسٹائل کی تعلیم کے پروگرام چلا رہی ہے اور اس کے یہ پروگرام نہ صرف پاکستان بلکہ برطانیہ کی یونیورسٹی سے بھی تسلیم شدہ ہیں۔

 انہوں نے کہا کہ این ٹی یو کا ٹیکسٹائل کی تعلیم دینے والی تقریباً تمام نمایاں بین الاقوامی یونیورسٹیوں کے ساتھ اشتراک ہے۔

وزیر اعظم نے ہر فورم پر کشمیر کے لئے آواز اٹھائی ،صدر مملکت

 انہوں نے بتایا کہ جامعہ کے فارغ التحصیل طلبہ کی بڑی مانگ ہے، اکثر طلباءکو اپنے آخری تعلیمی سال کے دوران ملازمت کی پیشکش ہو جاتی ہے۔

صدر مملکت نے مستند اور ہنرمند افرادی قوت تیار کرنے میں این ٹی یو کے کردار کو سراہتے ہوئے کہا کہ یونیورسٹی کا نہ صرف ٹیکسٹائل کی صنعت کی ترقی بلکہ ملکی برآمدات بڑھانے میں بھی اہم کردار ہے۔

صدر مملکت ڈاکٹر عارف علوی نے  مزید کہا کہ یونیورسٹیوں کو جدید انفارمیشن ٹیکنالوجیز کو اختیار کرنے کی ضرورت ہے تاکہ کورونا وائرس کی وباءکے تناظر میں درپیش چیلنجوں میں معیاری تعلیم کو یقینی بنایا جا سکے۔