کوروناوائرس کے پھیلاؤ کو روکنے کے لیے سندھ حکومت نے جمعہ کوصوبے میں تمام دکانیں بند رکھنے اور مکمل لاک ڈاؤن کا اعلان کردیا۔

تفصیلات کے مطابق سندھ حکومت کی جانب سے کورونا وائرس کے پیش نظرعوام کی حفاظت کے لئے ایک اور بڑا فیصلہ کرلیا گیا جس کے مطابق کل جمعہ کے روز دوپہر 12 سے 3 بجے تک لاک ڈاؤن کو مزید سخت کرنے کے احکامات جاری کردیئے گئے ہیں۔

صوبائی وزیر اطلاعات سندھ ناصر حسین شاہ نے اپنے ایک بیان میں کہا کہ حکومت سندھ نے کل 3 بجے تک تمام دکانیں بند رکھنے کا فیصلہ کیا ہے۔

ناصر حسین شاہ نے مزید کہا کہ کل صبح سے 3 بجے تک مکمل لاک ڈاون ہوگا اور کل سبزی اور فارمیسی کی دکانیں بھی 3 بجے تک بند رہیں گی۔

یاد رہے اس سے قبل وزیر اعلیٰ سندھ سید مراد علی شاہ نے میڈیا سے گفتگو کرتے ہوئے کہا تھا کہ میں نے پولیس کو ہدایت کردی ہے کہ مساجد میں کوئی سختی نہ کرے لیکن عوام سے یہی اپیل ہے کہ کل ہم دوبارہ دوپہر 12 سے 3 بجے تک سڑکوں پر سب بند کردیں گے۔

جمعہ کی نماز ہوگی یا نہیں؟ سندھ حکومت کا بڑا فیصلہ

سید مراد علی شاہ نے یہ بھی کہا تھا کہ مساجد کھلی رہیں گی جہاں متعین افراد نماز ادا کریں گے، باقی لوگوں سے یہی درخواست ہے کہ گھروں پر نماز ادا کریں۔

واضح رہے کہ اس سے قبل بھی کورونا وائرس کے پیش نظر عوام کی حفاظت کے لئے  سندھ حکومت نے نماز جمعہ کے اجتماع کو محدود رکھنے اور دوپہر 12 بجے سے سہ پہر 3 بجے تک مکمل لاک ڈاؤن کا اعلان کیا تھا۔