گذشتہ ہفتے کراچی کے علاقے ماڈل کالونی میں پیش آنے والے پی آئی اے کے طیارہ حادثے کے نتیجے میں جاں بحق افراد کی میتوں کے حوالے سے کمشنر آفس کی جانب سے ایس او پیز جاری کردئے گئے ہیں۔

تفصیلات کے مطابق حادثے میں جاں بحق افراد میں سے کئی میتیں لواحقین کے حوالے کی جاچکی ہیں لیکن چند میتیں اب بھی شناحت کے قابل نہیں تھیں جس کے باعث ان کے ڈی این اے سیمپل لئے گئے تھے اور اب ڈی این اے میچ ہونے پر کمشنر کراچی کے احکامات کے مطابق ایس او پیز کے تحت میتوں کو لواھقین کے حوالے کیا جائیگا۔

کمشنر کراچی کی جانب سے جاری کردہ ایس او پیز میں بتایا گیا ہے کہ ڈپٹی کمشنر ایدھی اور چھیپا سردخانوں پر اسسٹنٹ کمشنرز تعینات کریں اور پولیس قانونی تقاضوں کے لئےسردخانوں پر ایس پیز کی ڈیوٹی لگائے۔

ہدایت نامے میں مزید بتایا گیا کہ دونوں سردخانوں پر ایم ایل او تعینات کئے جائیں اور ڈی این اے ملنے پر پولیس افسر اور ایم ایل او لاش حوالگی کے تقاضے پورے کریں۔

پولیس افسر اور ایم ایل او لاش کی فزیکل تصدیق کا عمل مکمل کریں بصورت دیگر اے سی اور ایم ایل او، ڈی این اے رپورٹ ملنے پر لواحقین سے رابطہ کریں۔

کمشنر کراچی کی جانب سے سخت احکامات دیئے گئے ہیں کہ ایس ایس پی لاش کی وصولی کے لئے لواحقین سے رابطہ کریں اور تقاضے پورے ہونے پر پولیس لواحقین کو عزت و احترام سے لاش حوالے کرے۔

یاد رہے کہ حادثے کا شکار ہونے والے  پی آئی اے کے طیارے میں 100 سے زائد افراد سوار تھے جن میں طیارے کا عملہ اور مسافر شامل تھے۔