وزیراعلیٰ سندھ  مراد علی شاہ کا کہنا ہے کہ کورونا  وائرس کے خلاف لڑنے کیلئے کراچی کو صاف ستھرا رکھنا ہوگا۔

وزیراعلیٰ سندھ سید مراد علی شاہ  نے بذیعہ وڈیو لنک  اجلاس کیا جس میں ورلڈ بینک کے کنٹری ڈائریکٹر پیٹچاموتھو الونگوان اپنی ٹیم کے ساتھ شریک ہوئے۔

وزیراعلیٰ سندھ کے ساتھ اجلاس میں وزیر توانائی امتیاز شیخ، وزیراعلیٰ سندھ کے کوآرڈینیٹر حارث گذدر، چیئرمین منصوبہ بندی و ترقی محمد وسیم، پرنسپل سیکریٹری، سیکریٹری توانائی، سیکریٹری خزانہ اور سیکریٹری انویسنٹمنٹ موجود تھے۔

اجلاس میں 100 ملین ڈالرز کے سندھ سولڈ ویسٹ مینجمنٹ (ایس ایس ڈبلیو ایم) پر تبادلہ خیال کیا گیا۔

ترجمان وزیراعلیٰ سندھ نے کہا کہ  یہ پروجیکٹ 5 سالوں میں مکمل ہوگا،  پروجیکٹ میں 2 گاربج ٹرانسفر اسٹیشن (جی ایس ٹی) اور 2 لینڈ فل سائیٹس کا قیام اور نالوں کی صفائی شامل ہے ۔

اجلاس میں فیصلہ کیا گیا کہ ایس ایس ڈبلوای ایم کے پروجیکٹ سی ڈی ڈبلیو پی سے منظور کروا کے ورلڈ بینک کو منظوری کے  لیے بھیجے گا۔

وزیراعلیٰ سندھ نے کہا کہ  کورونا وائرس کی وباء کے خلاف مزید اقدامات بھی کرنا ہوں گے، ہم چاہتے ہیں کہ ایسا نظام متعارف کروائیں جس میں مسافر بسوں اور شہر کو ڈس انفیکٹ کرنا ہوگا۔

مراد علی شاہ نے بتایا کہ اس پروجیکٹ کی لاگت 4.8 ملین ڈالرز ہے۔یہ پروجیکٹ اصولی طور پر منظور کیا گیا۔ صوبے کے دیگر شہروں کو بھی ڈس انفیکٹ رکھنے کے لیے اقدامات کریں گے۔

انہوں نے مزید کہا کہ   کورونا وائرس کے ساتھ ٹڈی دل کا خطرہ بڑھتا جارہا ہے، اس سےفوڈ سکیورٹی کے مسائل پیدا ہو سکتے ہیں۔

وزیراعلیٰ سندھ نے  کہا کہ ورلڈ بینک سے  ٹڈی دل کے خلاف آپریشن میں ٹیکنیکل اور فنانشل مدد ملے گی۔ورلڈ بینک نے سندھ حکومت کی مکمل مدد کرنے کی یقین دہانی کروائی ہے۔