وزیرخارجہ مخدوم شاہ محمود قریشی نے کہا ہے کہ پاکستان دنیا کے تمام اہم فورمز پر بھارت کے عزائم کو بے نقاب کر چکا ہے، دراصل بھارت، فالس فلیگ آپریشن کے بہانے تلاش کر رہا ہے۔

تفصیلات کے مطابق وزیر خارجہ مخدوم شاہ محمود قریشی نے بھارتی عزائم کے حوالے سے اہم بیان میں کہا کہ ہم سیکورٹی کونسل، اقوام متحدہ، پی 5 کے نمائندگان کو وقتاً فوقتاً بھارتی منفی عزائم کے حوالے سے مفصل بریف کر چکے ہیں۔

وزیرخارجہ  نے کہا کہ بھارت پاکستان پر دراندازی کرنے اور کشمیر میں دہشت گردانہ کارروائیوں کے بے بنیاد الزامات لگا کر دنیا کی آنکھوں میں دھول جھونکنے کی کوشش کر رہا ہے۔

شاہ محمود قریشی نے یہ بھی کہا کہ کشمیر میں اس وقت جو صورتحال ہے وہ بھارت کی اپنی پیداکردہ ہے، گذشتہ نو ماہ سے نہتے کشمیری بھارتی کرفیو کا سامنا کر رہے ہیں۔

وزیرخارجہ کا کہنا تھا کہ دنیا یہ توقع کر رہی تھی کہ شاید کرونا کی وجہ سے  ہندوستان کے رویے میں تبدیلی آئے گی مگر بدقسمتی سے ایسا نہیں ہوا اور اب ہندوستان میں مقبوضہ کشمیر کے اندر ایک پرامن تحریک جنم لے چکی ہے وہ لوگ جو پہلے بھارت کے ساتھ حکومت میں شامل تھے آج دوسری جانب کھڑے دکھائی دیتے ہیں۔

شاہ محمود قریشی نے کہا کہ بھارت کے خلاف کشمیریوں میں پایا جانے والا غم و غصہ فطری ہے بھارت نے جس طرح کشمیر کو تین حصوں میں تقسیم کیا ہے اور اس کی خصوصی حیثیت ختم کرنے کی کوشش کی ہے اس سے نہ صرف کشمیری مسلمان بلکہ کشمیری پنڈت اور دیگر اقلیتیں بھی ناخوش ہیں۔

وزیرخارجہ کا اپنے کویتی ہم منصب سے رابطہ ، وبائی چیلنج سے نمٹنے کے لئے مشاورتی رابطے جاری رکھنے پر اتفاق

وزیرخارجہ نے یہ بھی کہا کہ مقبوضہ جموں و کشمیر کے حوالے سے الحمدللہ تمام سیاسی پارٹیوں میں اتفاق رائے پایا جاتا ہے، ایک سے زیادہ مرتبہ متفقہ طور پر پارلیمنٹ میں قراردادیں منظور ہو چکی ہیں۔

شاہ محمود قریشی کا کہنا تھا کہ آج بھارت کا چہرہ بے نقاب کرنے کی ضرورت ہے بھارت سرکار کشمیریوں سے اس قدر خائف ہے کہ جب وہ گھروں میں گھس کر تشدد کرتے ہیں اور نوجوانوں کو اغوا کرتے ہیں تو ان کی لاشیں بھی واپس نہیں کرتے۔

وزیرخارجہ نے کہا کہ اقوام متحدہ کے سیکرٹری جنرل نے واضح کہا کہ کرونا کی وبا اس قدر تشویشناک ہے کہ جنگ زدہ علاقوں میں فوری طور پر جنگ بندی کا نفاذ ہونا چاہیے لیکن یہاں معاملہ برعکس ہے صرف اپریل کے مہینے میں لاین آف کنٹرول کی خلاف ورزیوں میں 36 شہادتیں ہو چکی ہیں۔

شاہ محمود قریشی نے یہ بھی کہا کہ آج بھارت کے اندر مسلمانوں کو کرونا وائرس کے پھیلاؤ کا موجب قرار دیا جا رہا ہے اسلام کے خلاف ایک نفرت آمیز رویہ اپنایا جا رہا ہے، میں اس ساری صورتحال پر بذریعہ خط سیکرٹری جنرل او آئی سی اور او آئی سی ممبر ممالک کے تمام وزرائے خارجہ کو مطلع کر چکا ہوں۔

وزیرخارجہ کا کہنا تھا کہ بھارت نے اپنی پالیسیوں اور ہندتوا سوچ کے ذریعے لوگوں کو خود سے متنفر کیا ہے پھر تشدد کے ذریعے انہیں کچلنے کی کوشش کی ہے، بھارت نے دنیا میں پاکستان کو بدنام کرنے کی کوشش کی لیکن کارگر نہ ہوئی۔

شاہ محمود قریشی کا یہ بھی کہنا تھا کہ ہماری مسلح افواج نے، ہمارے سیکورٹی فورسز نے اپنی جانوں کے نذرانے پیش کر کے دہشت گردی کے خلاف جنگ میں کامیابی حاصل کی جبکہ پاکستان نے افغانستان میں دیرپا قیام امن کیلئے جو مصالحانہ کردار پاکستان نے ادا کیا آج پوری دنیا اسے سراہ رہی ہے۔

وزیرخارجہ نے کہا کہ بلوچستان میں شرپسند اور امن مخالف گروہوں کی بھارتی پشت پناہی آج کسی سے ڈھکی چھپی نہیں – ایک دن کھلے عام میڈیا پر پاکستان کو دھمکیاں دی جاتی ہیں اور اگلے روز بلوچستان میں ہمارے سیکورٹی فورسز کے نوجوان شہید کیے جاتے ہیں۔

شاہ محمود قریشی نے یہ بھی کہا کہ بلوچستان میں پائی جانے والی بیرونی مداخلت کو روکنے کیلئے اور ان ہاتھوں کو بے نقاب کرنے کیلئے ہمیں ایک مرتبہ پھر اتفاق رائے پیدا کرنا ہو گا۔

وزیرخارجہ مخدوم شاہ محمود قریشی ن مزید کہا کہ بلوچستان کی بلوچ قیادت اور پختون قیادت کو وزارت خارجہ آنے کی دعوت دیتا ہوں اور اگر بلوچستان کے قایدین چاہیں گے تو میں کوئٹہ جانے کیلئے بھی تیار ہوں۔