بلوچستان حکومت نے سمارٹ لاک ڈاؤن میں 15 جولائی تک توسیع کردی۔

تفصیلات کے مطابق بلوچستان حکومت نے سمارٹ لاک ڈاؤن میں مزید 15 دن کی توسیع کردی ، صوبے میں لاک ڈائون سے متعلق نوٹیفکیشن جاری کردیا۔

نوٹیفکیشن کے مطابق بلوچستان میں اسمارٹ لاک ڈاؤن 15 جولائی تک جاری رہے گا جبکہ صوبے میں تمام کاروباری مراکز صبح 9 سے شام 7 بجے تک کھولنے کی اجازت ہوگی ۔

نوٹیفکیشن میں کہا گیا ہے کہ صوبے میں کاروباری مراکز ہفتے میں چھ دن کھولیں گے جبکہ جمعے کو مکمل لاک ڈاؤن ہوگا اور بیکری ائٹمز کی دکانیں ہفتے کے ساتھ 9 بجے سے رات 9 بجے تک کھولنے کی اجازت ہوگی۔

نوٹیفکیشن میں یہ بھی کہا گیا ہے کہ میڈیکل تندور دودھ دہی اور ضروری اشیاء کی دکانوں پر پابندی عائد نہیں ہوگی جبکہ ہوٹل ریسٹورنٹس پر صرف آن لائن آرڈر اور ٹیک آوے کی سہولت ہوگی۔

لاک ڈاؤن میں 15 جولائی تک توسیع

نوٹیفکیشن میں مزید کہا گیا ہے کہ پبلک ٹرانسپورٹ ایس او پیز کے تحت جاری رہیں گی جبکہ دس سے زائد افراد کے مذہبی سماجی ہر قسم کے اجتماع پر پابندی عائد ہوگی اور تمام تعلیمی ادارے اور لینگوئج سینٹرز 15 جولائی تک بند رہیں گے۔

واضح رہے کہ اس سے قبل قومی اسمبلی میں خطاب کرتے ہوئے کورونا وائرس کی صورتحال کے حوالے سے وزیر اعظم کا کہنا تھا کہ  مجھ پرلاک ڈاؤن کے حوالے سے تنقید کی گئی، اگر مجھ سے پوچھا جاتا تو میں کبھی سخت لاک ڈاؤن نہیں کرنے دیتا اور آج دنیا اسمارٹ لاک ڈاؤن کی طرف گئی ہے۔

عمران خان نے کہا تھا کہ  ہمیں بھی مکمل لاک ڈاؤن کا کہا گیا لیکن ہم نے زیادہ سخت لاک ڈاؤن نہیں کیا، لاک ڈاؤن میں دیہاڑی دار طبقہ متاثر ہوتا ہے۔

ان کا کہنا تھا کہ  ہم نے اسمارٹ لاک ڈاؤن کو اپنایا تاکہ معیشت چل سکے، ہم نے  کورونا ایس او پیز کے تحت معیشت کھولی، ہمیں ابھی بھی معاشی طور پر چیلنجز کا سامنا ہے۔