کراچی میں بجلی کا بحران، کے الیکٹرک نے اپنی ناکامی کا ملبہ وفاقی حکومت پر ڈال دیا۔

تفصیلات کے مطابق کے الیکٹرک نے شہر قائد میں لوڈ شیڈنگ   کی ذمہ داری وفاقی حکومت پر عائد کردی۔

کے الیکٹرک کی جانب سے جاری بیان میں حکومت پر ذمہ داری عائد کرتے ہوئے کہا گیا کہ فرنس آئل کی درآمد پر پابندی بجلی بحران کی بنیادی وجہ بنی۔

کے الیکٹرک اور دیگر بجلی کمپنیوں نے فرنس آئل کی قلت سے متعلق متعلقہ اداروں کو کئی بار آگاہ کیا۔کے الیکٹرک نے 2 جون کو پی ایس او انتظامیہ کو خط لکھ کر فرنس آئل دینے کی درخواست کی ۔

کے الیکٹرک کی درخواست پر پی ایس او نے جواب دیا کہ  درآمدی پابندی کی وجہ سے فرنس آئل کی مطلوبہ مقدار میں فراہمی ممکن نہیں ہے۔

دوسری جانب پاور  ڈویژن کے ذرائع کا کہنا ہے کہ  پی ایس او کی سفارش پر حکومت نے 20 جون کو فرنس ائل کی درآمد سے پابندی اٹھالی تھی اور پیٹرولیم ڈویژن نے 23 جون کو کے الیکٹرک کو فرنس آئل کی سپلائی کی اجازت دی تھی۔

ذرائع کا مزیدکہنا ہے کہ  بجلی کی پیداوار کے لیے کے الیکٹرک کو طلب کے مطابق فرنس آئل فراہم کیا جا رہا ہے جبکہ کے الیکٹرک کو کوٹہ کے مطابق گیس کی سپلائی بھی فراہم کی جا رہی ہے۔

ذرائع پاور ڈویژن کا کہنا ہے کہ  کے الیکٹرک کی جانب سے فرنس ائل اور گیس کی قلت کے دعوے غلط ہیں۔ کے الیکٹرک اپنی ناکامی کا ملبہ دوسرے اداروں پر مت ڈالے۔

ذرائع کا کہنا ہے کہ کراچی میں 10 سے 14 گھنٹے لوڈشیڈنگ پر نیپرا کو سخت کارروائی کی ہداہت کی گئی ہے۔نیپرا کی 2019 کی رپورٹ میں بھی کےالیکٹرک کو دانستہ بجلی کی کم فراہمی کا ذمہ دار قرار دیا گیا تھا۔