پنجاب حکومت نے لاک ڈاؤن میں 30 جون تک توسیع کردی ہے۔

تفصیلات کے مطابق پنجاب حکومت نے کورونا وائرس کے بڑھتے کیسز کے پیش نظر لاک ڈاؤن میں 30 جون تک توسیع کردی، سیکرٹری پرائمری اینڈ سکینڈری ہیلتھ کئیر نے نوٹیفکیشن جاری کر دیا، نوٹیفکیشن کا اطلاق فی الفور ہو گا اور تاحکم ثانی لاگو رہے گا۔

سیکرٹری پرائمری اینڈ سکینڈری ہیلتھ کئیر کیپٹن (ر) محمد عثمان کی جانب سے جاری نوٹیفکیشن میں یو ایچ ایس کو سپلیمنٹری امتحانات لینے کی اجازت دی گئی ہے جبکہ بی ڈی ایس، بی ایس سی نرسنگ، ڈاکٹر آف فزیکل تھراپی اور بی ایس سی الائیڈ ہیلتھ سائنسز آخری سال کے ضمنی امتحانات لیے جا سکیں گے۔

سیکرٹری پرائمری اینڈ سکینڈری ہیلتھ کیئر پنجاب کی جانب سے جاری نوٹیفکیشن میں مزید کہا گیا کہ یو ایچ ایس امتحان کے علاوہ کسی بھی انڈسٹری کو چھوٹ نہیں دی گئی جب کہ نوٹیفکیشن کا اطلاق فی الفور ہو گا اور تاحکم ثانی لاگو رہے گا۔

یاد رہے کہ اس سے قبل وفاقی حکومت اور صوبائی کابینہ کی سفارشات کی روشنی میں پنجاب حکومت نے لاک ڈاؤن میں 15 جون تک توسیع کر کے نوٹیفکیشن جاری کردیا تھا۔

لاک ڈاؤن میں 15 جون تک توسیع

نوٹیفکیشن میں کہا گیا تھا کہ تمام کاروباری مقامات صبح 9 سے شام 7 بجے تک، سوموار تا جمعہ کھلے رہیں گے جبکہ میڈیکل سٹور، پنکچر شاپ، آٹا چکی تندور، زرعی ورکشاپس 24 گھنٹے کھلی رکھنے کی اجازت ہو گی۔

  نوٹیفکیشن میں یہ بھی کہا گیا تھا کہ کال سنٹرز کو 50 فی صد سٹاف کے ساتھ کھلا رکھنے کی اجازت ہو گی جبکہ بین الاضلاع ٹرانسپورٹ 24 گھنٹے چلنے کی اجازت ہو گی۔

نوٹیفکیشن میں مزید کہا گیا تھا کہ تمام چرچ صرف اتوار کو صبح 7 سے شام 5 بجے تک عبادت کے لیےکھلے رہیں گے جبکہ گروسری اور کریانہ سٹور صبح 9 سے شام 7 تک، ہفتہ بھر کھلے رہیں گے۔