اقتصادی رابطہ کمیٹی (ای سی سی) نے ملک میں گندم اور آٹے کی قیمتوں میں کمی کے حوالے سے اقدامات کی منظوری دے دی۔

تفصیلات کے مطابق مشیر خزانہ ڈاکٹر عبدالحفیظ شیخ کی زیر صدارت اقتصادی رابطہ کمیٹی (ای سی سی)  کے اجلاس کا اعلامیہ جاری کردیا گیا۔

اجلاس میں  قیمتوں پر کنٹرول  کے لیے نجی شعبےکو گندم کی درآمد کی اجازت دے دی گئی ہے۔ نجی شعبے  کے لیے گندم کی درآمد کی کوئی حد نہیں ہوگی۔

ای سی سی اجلاس میں فیصلہ کیا گیا کہ صوبائی حکومتوں کو فوری طور پر گندم کی ریلیز کی پالیسی کے اعلان کا کہا جائے گا۔ پنجاب آئندہ 2 ماہ کے دوران صوبے کی فلور ملز کو 9 لاکھ ٹن گندم فراہم کرے گا۔

اعلامیے میں بتایا گیاکہ  پاسکو، کے پی اور بلوچستان کی گندم کی ضروریات کا جائزہ لے گا۔ پنجاب سے کے پی اور بلوچستان کے لیے گندم کی فراہمی کو آسان بنایا جائے گا۔

اس کے علاوہ اجلاس میں  سی ڈی اے کو میٹرو کی ادائیگیوں کی مد میں ڈھائی ارب روپے کی سپلیمنٹری گرانٹ کی  بھی منظوری دی گئی۔

شہداء کے اہل خانہ کو ادائیگی  کے لیے 20کروڑ  روپے کی گرانٹ کی سمری  کی  بھی منظور ی دی گئی۔دارالحکومت پولیس کے شہداء کے اہلخانہ کو 3.6کروڑ کی فراہمی  کے ساتھ 10.5کروڑ کے واجبات کی ادائیگی کی سمری کی بھی منظور ی دی گئی۔

ای سی سی نے وزارت دفاع کی آئی ایس آئی کو 45 ایکڑ اراضی کی الاٹمنٹ کی سمری  بھی منظور کرلی۔ یہ اراضی 2250 روپے فی مربع گز کے ریٹ پر 49 کروڑ میں فراہم کی جائے گی۔

صحت کے شعبے  کے  لیے آکسیجن اور سلنڈرز پر ٹیکس چھوٹ دینے کی بھی منظوری دی گئی ۔آکسیجن سلنڈر کی قیمتوں میں کنٹرول کے لیے 3 ماہ تک مراعات دینے کی منظوری دی گئی۔