امیر جماعت اسلامی پاکستان سینیٹر سراج الحق نے اپوزیشن لیڈر شہباز شریف اور دیگر رہنماﺅں کو فون کیا اور ان کی خیریت دریافت کی ۔

تفصیلات کے مطابق امیر جماعت اسلامی پاکستان سینیٹر سراج الحق نے پاکستان مسلم لیگ (ن) کے صدر اور قائد حزب اختلاف میاں شہباز شریف کو آرام کرنے کا مشورہ دیا ،   کورونا  ٹیسٹ مثبت آنے،  قرنطینہ اور علاج سے متعلق دریافت کیا۔

ٹیلیفونک رابطے کے دوران امیر جماعت اسلامی نے شہباز شریف اور دیگر رہنماﺅں کیلئے جلد صحت یابی کی دعا کی اور کہا کہ قوم اجتماعی طور پر رجوع الی اللہ اور توبہ و استغفارکرے۔

امیر جماعت اسلامی پاکستان سینیٹر سراج الحق نے کہا کہ کورونا وبا سے بچنے کیلئے احتیاطی تدابیر پر عمل کرنا ہوگا، ہر فرد اپنے ساتھ ساتھ دوسروں کو وبا سے بچانے کیلئے احتیاطی تدابیر پر سختی سے عمل کرے ۔

یاد رہے اس سے قبل امیر جماعت اسلامی پاکستان سینیٹر سراج الحق نے سابق وزیر اعظم شاہد خاقان عباسی ،احسن اقبال ،وزیر ریلوے شیخ رشید اور سعد رفیق کو بھی فون کیا تھا اور اور ان کی خیریت دریافت کی تھی۔

مولانا فضل الرحمن کا کورونا وائرس میں مبتلا شہباز شریف کو فون

واضح رہے کہ قومی اسمبلی میں قائد حزب اختلاف شہباز شریف بھی کورونا وائرس کا شکار ہوگئے۔

شہباز شریف کے کورونا ٹیسٹ مثبت آنے پر بیان میں فیاض الحسن چوہان نے کہا تھا کہ کورونا میں مبتلا دیگر لیگی قائدین کے لیے بھی جلد صحتیابی کی دعا کرتے ہیں۔

انہوں نے کہا تھا شہباز شریف کا صحت مند رہنا پاکستان اور پاکستانی عوام کے لیے بڑا ضروری ہے، امید ہے شہباز شریف قرنطینہ کے بعد کورونا کے خلاف عملی اقدامات میں بڑھ چڑھ کر حصہ لیں گے۔