اقتصادی رابطہ کمیٹی (ای سی سی )نے کورونا  وائرس سے نمٹنے کے لیے چین سے 7 ارب 84 کروڑ روپے کا سامان خریدنے کی منظوری دے دی۔

تفصیلات کے مطابق  مشیر خزانہ ڈاکٹر عبدالحفیظ شیخ کی زیر صدارت اقتصادی رابطہ کمیٹی (ای سی سی ) کا اجلاس  ہوا جس میں  مختلف اداروں کے لیے تکنیکی سپلیمنٹری گرانٹس کی منظوری دی گئی۔

اجلاس میں کورونا  وائرس سے نمٹنے کے لیے چین سے 7 ارب 84 کروڑ روپے کا سامان خریدنے کی منظوری دی گئی ۔ این ڈی ایم اے کے ذریعے سامان پہلے ہی پاکستان پہنچ چکا ہے۔

اس کے علاوہ  پنجاب میں ٹڈی دل پر قابو پانے کے لیے 10 کروڑ روپے فنڈز کی منظوری دی گئی جبکہ  ایٹمی توانائی کمیشن کے لیے ایک ارب 30 کروڑ روپے کی گرانٹ منظور کی گئی۔

رینجرز کے لیے 23 کروڑ 50 لاکھ روپے کی سپلیمنٹری گرانٹ کی منظور ی دی گئی جبکہ   کورونا سے متعلق میڈیا مہم چلانے کے لیے 50 کروڑ روپے فنڈز کی بھی منظوری  دی گئی۔

پی آئی اے کو قرضوں پر سود کی ادائیگی کے لیے 3 ارب 20 کروڑ روپے کی فراہمی کی منظوری دی گئی۔

ای سی سی نے اسٹیٹ بینک کے زریعے ایس ایم ای سیکٹر کے لیے اسکیم میں مزید بہتری لاتے ہوئے  اعلان کیا کہ 80 کروڑ ٹرن اوور والے ایس ایم ایز کا 60 فیصد نقصان حکومت برداشت کرے گی۔

ای سی سی اجلاس میں فیصلہ کیا گیا کہ چھوٹے اور درمیانے کاروبار والے اپنے ورکرز کو ملازمت سے نہ نکالنے کے پابند ہوں گے۔