وزیر خارجہ شاہ محمود قریشیی کی جانب سے کورونا وبا کے باعث نیدرلینڈ میں ہونیوالے جانی نقصان پر گہرے دکھ اور افسوس کا اظہار کیا گیا ہے۔

تفصیلات کے مطابق وزیر خارجہ مخدوم شاہ محمود قریشی کا نیدر لینڈ کے وزیر خارجہ مسٹرسٹیف بلاک سے ٹیلیفونک رابطہ ہوا ہے جس میں کورونا عالمی وبائی صورتحال سمیت باہمی دلچسپی کے امور پر تبادلہ خیال بھی کیا گیا ہے۔

رابطے میں وزیر خارجہ نے کورونا وبا کے باعث نیدرلینڈ میں ہونیوالے والے جانی نقصان پر گہرے دکھ اور افسوس کا اظہار کرتے ہوئے، نیدرلینڈ اور یورپی یونین کی طرف سے، رکن ممالک میں، کورونا وائرس کے پھیلاؤ کو روکنے اور معاشی استحکام کیلئے اٹھائے گئے بروقت اقدامات کی تعریف کی ہے۔

شاہ محمود قریشی کا کہنا تھا کہ اس وبائی چیلنج کو مدنظر رکھتے ہوئے، ترقی پذیر ممالک کی معاشی بحالی کیلئے عالمی سطح پر ایک جامع، مربوط اور مشترکہ لائحہ عمل اپنانے کی ضرورت ہے۔

وزیر خارجہ نے اپنے ڈچ ہم منصب کو، ترقی پذیر ممالک کی معیشتوں کو سہارا دینے کے لیے، عالمی سطح پر وزیر اعظم عمران خان کی ڈیٹ ریلیف کی تجویز کے خدوخال سے آگاہ کیا۔

پاکستان کو بیک وقت دو چیلنجز کا سامنا ہے، شاہ محمود قریشی

دونوں وزرائے خارجہ کے مابین دو طرفہ تجارت اور سرمایہ کاری کے فروغ کے حوالے سے بھی مفصل بات چیت ہوئی جبکہ وزیر خارجہ نے اپنے ہم منصب کو ، حالات معمول پر آنے کے بعد ، کرونا وبا کے باعث،قبل ازیں موخر کیے گئے دورہ پاکستان کی یاد دہانی کرائی ہے۔

ڈچ وزیر خارجہ کی جانب سے وزیر خارجہ مخدوم شاہ محمود قریشی کا شکریہ ادا کرتے ہوئے جلد دورہ ء پاکستان کرنے کا عندیہ دیا گیا ہے۔

انہوں نے بتایا کہ مقبوضہ جموں و کشمیر میں انسانی حقوق کی تشویشناک صورتحال پر بات کرتے ہوئے وزیر خارجہ نے کہا کہ مقبوضہ کشمیر کے 80 لاکھ نہتے باسی، بدترین بھارتی جبر کا سامنا کر رہے ہیں – بھارتی قابض افواج نے بے جا تشدد، ماورائے عدالت قتل، اور انسانی حقوق کی سنگین خلاف ورزیوں کو معمول بنا رکھا ہے۔

وزیر خارجہ کا مزید کہنا تھا کہ بین الاقوامی قوانین اور اقوام متحدہ کی قراردادوں سے انحراف کرتے ہوئے، ڈومیسائل قوانین میں ترمیم کے ذریعے، بھارت سرکار، مقبوضہ جموں و کشمیر میں آبادیاتی تناسب کو بدلنے کی مذموم کوشش کر رہی ہے جس کی بھرپور مذمت کرتے ہیں۔