وفاقی وزیر برائے منصوبہ بندی اسد عمر نے کہا ہے کہ پانی کی مناسب اور مستقل فراہمی کو یقینی بنانے کے لئے حکومت کی جانب سے کافی مالی وسائل مہیا کردیئے گئے ہیں۔

تفصیلات کے مطابق وفاقی وزیر برائے منصوبہ بندی اسد عمر کی زیرصدارت اسلام آباد میں پانی کی فراہمی میں بہتری  کے لئے جائزہ اجلاس منعقد کیا گیا۔

اجلاس میں وزیر منصوبہ بندی کی جانب سے پانی کے غیر قانونی کنکشنز کو فوری طور پر ختم کرنے اور مجرموں کے خلاف سخت قانونی کارروائی کرنے کی ہدایت کی گئی ہے۔

اجلاس میں وفاقی وزیر کو چیف میونسپل آفیسر کی جانب سے بریفنگ کے ذریعے بتایا گیا کہ حالیہ ہفتوں میں پانی کی قلت کے مسئلے کو حل کرنے کے لئے متعدد اقدامات اٹھائے گئے ہیں۔

انہوں نے کہا کہ پانی کے موجودہ پلان میں پینے کے صاف پانی کے فلٹریشن، پلانٹوں کی بحالی اور نئے ٹیوب ویلوں کی موجودہ اور تنصیب کی دیگر تدبیریں بھی شامل ہیں اور ہنگامی صورتحال کے لئے غیر فعال پانی کے ٹینکروں کی مرمت بھی کردی گئی ہے۔

چیف میونسپل آفیسر کی جانب سے آگاہ کیا گیا ہے کہ غیر قانونی پانی کے کنکشنز کے خلاف بھی کارروائی کی جارہی ہے جس کے بعد رواں ماہ کے آخر تک پانی کی فراہمی کی صورتحال میں کافی حد تک بہتری آجائے گی۔

یاد رہے کہ اجلاس میں وزیراعظم کے معاون خصوصی علی نواز اعوان، راجہ خرم نواز، چیف آفیسر میٹرو پولیٹن کارپوریشن اور دیگر نے شرکت کی۔