لیاری میں کھڈا مارکیٹ کے قریب رہائشی عمار ت گر گئی جس کے باعث علاقہ مکینوں مین خوف طاری ہوگیا ۔

سندھ رینجرز کا کہنا ہے کہ لیاری میں کھڈا مارکیٹ کے قریب رہائشی عمارت  گر نے سے  ایک شخص جاں بحق، متعدد زخمی ہوئے جبکہ کئی افراد کے ملبے میں دبے ہونے کا خدشہ بھی ہے ۔

سندھ رینجرز کا  کہنا ہے کہ نیا آباد گلی نمبر چار میں عمارت گرنے کا حادثہ پیش آیا ہے۔ عمارت گرنے کی اطلاع ملتے ہی امدادی اداروں کے رضاکاروں اور رینجرز سمیت علاقہ پولیس کی بھاری نفری جائے وقوع پر پہنچی اورامدادی سرگرمیوں میں حصہ لینا شروع کردیا۔

 سندھ رینجرز  نے کہا کہ گنجان آبادی اور تنگ راستے ہونے کی وجہ سے امدادی کارروائیوں میں مشکلات درپیش ہیں، ملبہ ہٹانے کے لیے بھاری مشینری درکار ہے تاہم تنگ راستوں کے باعث مشینری کے جائے حادثہ پر پہنچنے میں دشواری پیش آرہی ہے۔

سندھ رینجرز نے مزید کہا کہ جاں بحق شخص کی نعش کو پوسٹ مارٹم کے لیے اسپتال منتقل کردیا گیا ہے جب کہ زخمیوں کو طبی امداد کے لیے سول اسپتال میں داخل کیا گیا ہے۔

دوسری جانب وزیراعلیٰ سندھ سید مراد علی شاہ کا کھارد مارکیٹ کے پاس رہائشی عمارت گرنے کا نوٹس لے لیا۔

وزیراعلیٰ سندھ نے کمشنر کراچی کو فوری حادثے کی جگہ پر امدادی کارروائی شروع کرنے اور رہائشیوں کی جانیں بچانے کی ہدایت کی۔

وزیراعلیٰ سندھ سید مراد علی شاہ نے کہا کہ امدادی کارروائیوں میں کوئی کثر نہ چھوڑی جائے ، پہلے امدادی کارروائی کی جائے پھر مکمل انکوائری رپورٹ پیش کریں۔