کراچی کے لیے وفاقی حکومت نے آئندہ مالی سال 2020-21 کے بجٹ میں ترقیاتی فنڈز مختص کرلیے۔

تفصیلات کے مطابق کراچی کے لیے وفاقی حکومت نے آئندہ مالی سال 2020-21 کے بجٹ دستاویز میں گرین لائن بس منصوبےکے لیے 11 ارب روپے مختص کیے گئے ہیں۔

بجٹ دستاویز میں کہا گیا ہے کہ ضلع جنوبی اور غربی کی مختلف یوسیز کے پانی، نکاسی آب اور سڑکوں کیے لیے 98 کروڑ 66 لاکھ روپے مختص کیے گئے ہیں۔

بجٹ دستاویز  کے مطابق گریٹرکراچی واٹر سپلائی اسکیم کے لیے 2 ارب 35 کروڑ 70 لاکھ روپے، منگھوپیر سے بنارس سڑک کی تعمیرنو کے لیے 65 کروڑ روپے جب کہ نشتر اور منگھوپیر سڑک کی تعمیرنوکے لیے 35 کروڑ روپے رکھے گئے ہیں۔

بجٹ دستاویز کے مطابق کے ایم سی فائر فائٹنگ سسٹم کی بحالی کے لیے 38 کروڑ 40 لاکھ روپے، ملیر لنک روڈ کے اوپر انٹرچینج کی تعمیر کے منصوبے کے لیے  50 کروڑ روپے  جبکہ ملیر بند کے اوپر سڑک کی تعمیر کے لیے 4 کروڑ 40 لاکھ کا ترقیاتی بجٹ مختص کیا گیا ہے۔

بجٹ دستاویز میں بتایا گیا ہے کہ ضلع شرقی کے پانی، نکاسی آب، سڑکوں کی تعمیر کے لیے 21 کروڑ 79 لاکھ روپے، ضلع کورنگی کے پانی، نکاسی آب، سڑکوں کی بہتری کے لیے 6 کروڑ 23 لاکھ روپے جبکہ ضلع وسطی کی مختلف یونین کونسلز کے پانی، نکاسی آب، سڑکوں کے لیے ایک ارب 32 کروڑ روپے مختص کیے گئے ہیں۔

بجٹ میں کوئی نیا ٹیکس نہیں لگایا گیا، وفاقی وزیر

واضح رہے اس سے قبل وفاقی وزیر  برائے صعنت و پیداوار حماد اظہر پاکستان تحریک انصاف (پی ٹی آئی) کی حکومت  کی جانب سے اپنا دوسرا وفاقی بجٹ برائے مالی سال 21-2020 قومی اسمبلی میں پیش کیا۔

بجٹ تقریر کے دوران  وفاقی وزیر صعنت و پیداوار حماد اظہر کا کہنا تھا کہ   نئے مالی سال 2020-21 کے بجٹ میں کوئی نیا ٹیکس نہیں لگایا گیا ہے۔

وفاقی وزیر نے کہا تھا کہ کرپشن کا خاتمہ ہمارا اولین رہنما اصول رہا ہے، تحریک انصاف سماجی انصاف پر یقین رکھتی ہے۔