صدر پی ٹی آئی کراچی خرم شیرزمان نے لیاری کھڈا مارکیٹ میں بلڈنگ گرنے کے واقعے پر افسوس کا اظہار کیا۔

تفصیلات کے مطابق تحریک انصاف کے رہنما خرم شیرزمان نے اپنے ایک بیان میں کہا کہ لیاری کھڈا مارکیٹ میں بلڈنگ گرنے کے واقعے میں زخمیوں کی صحتیابی کے لیے دعاگو ہیں۔،

خرم شیر زمان نے کارکنوں کو حادثے کی جگہ پہنچ کر امدادی کاموں میں حصہ لینے کی ہدایت دی اور کہا کہ جائے وقوعہ پر ریسکیو کے کام میں مزید تیزی لائی جائے جبکہ فلاحی ادارے لوگوں کی مدد یقینی بنائیں۔

صدر پی ٹی آئی کراچی خرم شیرزمان نے مزید کہا کہ ایس بی سی اے اور سندھ حکومت کی ملی بھگت کا خمیازہ عوام کو بھگتنا پڑ رہا ہے، ایس بی سی اے نے کراچی کو بلڈنگوں کا شہر بنادیا ہے جبکہ سندھ حکومت کی وجہ سے کراچی کے شہری آئے روز سانحات کو منہ دے رہے ہیں

یاد رہے اس سے قبل سندھ رینجرز کا کہنا تھا کہ لیاری میں کھڈا مارکیٹ کے قریب رہائشی عمارت  گر نے سے  ایک شخص جاں بحق، متعدد زخمی ہوئے جبکہ کئی افراد کے ملبے میں دبے ہونے کا خدشہ بھی ہے ۔

سندھ رینجرز کا یہ بھی کہنا تھا کہ نیا آباد گلی نمبر چار میں عمارت گرنے کا حادثہ پیش آیا ہے۔ عمارت گرنے کی اطلاع ملتے ہی امدادی اداروں کے رضاکاروں اور رینجرز سمیت علاقہ پولیس کی بھاری نفری جائے وقوع پر پہنچی اورامدادی سرگرمیوں میں حصہ لینا شروع کردیا۔

لیاری میں رہائشی عمارت گر گئی

 سندھ رینجرز  نے کہا تھا کہ گنجان آبادی اور تنگ راستے ہونے کی وجہ سے امدادی کارروائیوں میں مشکلات درپیش ہیں، ملبہ ہٹانے کے لیے بھاری مشینری درکار ہے تاہم تنگ راستوں کے باعث مشینری کے جائے حادثہ پر پہنچنے میں دشواری پیش آرہی ہے۔

سندھ رینجرز نے مزید کہا تھا کہ جاں بحق شخص کی نعش کو پوسٹ مارٹم کے لیے اسپتال منتقل کردیا گیا ہے جب کہ زخمیوں کو طبی امداد کے لیے سول اسپتال میں داخل کیا گیا ہے۔