خیبر پختونخوا میں سرکاری دفاتر میں ملازمین کے لئے بغیر ماسک کے داخلے پر پابندی عائد کردی گئی ہے۔

تفصیلات کے مطابق خیبر پختونخوا کی حکومت کی جانب سے اعلامیہ جاری کیا گیا ہے جس میں بتایا گیا ہے کہ اب سے صوبے بھر کے تمام سرکاری ملازمین پر سرکاری دفاتر میں بغیر ماسک کے داخلے پر پابندی عائد کردی گئی ہے۔

، اعلامیے میں کہا گیا ہے کہ بغیر ماسک کے تمام سرکاری دفاتر میں داخلے پر پابندی ہوگی۔

یاد رہے کہ ماسک پہننے کی یہ پابندی کورونا وائرس کے پھیلاؤ کے باعث اور وائرس کے روک تھام کیلئے لگائی گئی ہے۔

اعلامیے میں یہ بھی کہا گیا ہے کہ تمام ادارے دفاتر کے باہر” نو ماسک نو انٹری” کے نوٹس لگائیں کیونکہ یہ پابندی خیبر پختونخوا کے تمام سرکاری دفاتر کیلئے ہے۔

نیدرلینڈ میں کورونا کے باعث اموات، پاکستان کا اظہار افسوس

یاد رہے کہ اس سے قبل وزیرِاطلاعات پنجاب فیاض الحسن چوہان نے کہا ہے کہ سرکاری دفاتر میں فیس ماسک پہننا لازمی قرار دے دیا گیا۔

اپنے بیان میں وزیرِاطلاعات پنجاب فیاض الحسن چوہان نے مزید کہا کہ کورونا کے پھیلاؤ کو روکنے کیلئے فیس ماسک پہننا لازمی ہے، پنجاب کے تمام سرکاری ملازمین اور افسران فیس ماسک لازمی پہنیں گے۔

محکمہ سروسز اینڈ جنرل ایڈمنسٹریشن کی جانب سے سرکاری دفاتر میں فیس ماسک پہننے کے حوالے سے صوبے کے تمام آفسران کو مراسلہ جاری کردیا گیا ہے۔

خیال رہے کہ ملک میں آج اب تک کورونا سے اموات کی مجموعی تعداد 1688 ہوگئی جب کہ نئے کیسز سامنے آنے کے بعد مریضوں کی تعداد 80463 تک پہنچ گئی ہے۔

اب تک سندھ میں 526 اور پنجاب میں کورونا سے 570 افراد انتقال کرچکے ہیں جب کہ خیبر پختونخوا میں 490 افراد جاں بحق ہو چکے ہیں۔

اس کے علاوہ بلوچستان میں 49، اسلام آباد 34 ، گلگت بلتستان میں 12 اور آزاد کشمیر میں مہلک وائرس سے 7 افراد جاں بحق ہو چکے ہیں۔