بلوچستان میں کورونا وائرس کے پیش نظر سرکاری دفاتر میں ماسک پہننا لازمی قرار دے دیا گیا۔

تفصیلات کے مطابق بلوچستان میں کورونا وائرس کے پیش نظر حکومت کی جانب سے  سرکاری دفاتر میں ماسک پہننے سے متعلق نوٹیفکیشن بھی جاری کردیا جس میں بتایا گیا ہے کہ اب سے صوبے بھر کے تمام سرکاری ملازمین پر سرکاری دفاتر میں بغیر ماسک کے داخلے پر پابندی عائد کردی گئی ہے۔

ذرائع کا کہنا ہے کہ سرکاری دفاتر کے باہر’نو فیس ماسک، نو انٹری’ کے بینرز آویزاں کرنے کی بھی ہدایت کی گئی ہے جبکہ خلاف ورزی کرنے والوں کے خلاف سخت کارروائی کی جائے گی۔

یاد رہے کہ ماسک پہننے کی یہ پابندی کورونا وائرس کے پھیلاؤ کے باعث اور وائرس کے روک تھام کیلئے لگائی گئی ہے۔

اس سے قبل وزیرِاطلاعات پنجاب فیاض الحسن چوہان نے کہا ہے کہ سرکاری دفاتر میں فیس ماسک پہننا لازمی قرار دے دیا گیا۔

اپنے بیان میں وزیرِاطلاعات پنجاب فیاض الحسن چوہان نے مزید کہا کہ کورونا کے پھیلاؤ کو روکنے کیلئے فیس ماسک پہننا لازمی ہے، پنجاب کے تمام سرکاری ملازمین اور افسران فیس ماسک لازمی پہنیں گے۔

پاکستان میں کورونا کے مریضوں کی تعداد 1 لاکھ سے متجاوز

واضح رہے پاکستان میں گزشتہ  24 گھنٹوں کےدوران کورونا کے مزید  4728کیسز اور 65 اموات رپورٹ ہوئی ہیں جس کے بعد کیسز کی مجموعی تعداد 1 لاکھ 3 ہزار 671ہوگئی ہے، جبکہ اس موذی وباء سے جاں بحق افراد کی کُل تعداد 2 ہزار67 ہو گئی ہے۔

 کورونا وائرس کے ملک میں 67 ہزار 12مریض اب بھی اسپتالوں، قرنطینہ مراکز اور گھروں میں آئسولیشن میں ہیں، جبکہ 34 ہزار 355مریض اس بیماری سے صحت یاب ہو چکے ہیں۔

اعدادوشمار کے مطابق اب تک پنجاب میں کورونا سے 715 اور سندھ میں 650 افراد انتقال کرچکے ہیں جبکہ خیبر پختونخوا میں 575  افراد،اور بلوچستان میں 54 افراد جاں بحق ہوچکے ہیں ۔