کراچی میں ہراسانی کا شکار ہونے والی لڑکی ارباب اختیار سے انصاف کی طلبگار ہے۔

تفصیلات کے مطابق  شہر قائد میں ہراسانی سے پریشان ماہا ملک کی ویڈیو سوشل میڈیا پر وائرل ہوگئی۔

ویڈیو میں ماہاملک چند عناصر کی جانب سے ہراسانی کی شکایت کرتی اور انصافی کی دہائی دیتی دکھائی دے رہی ہے۔ ویڈیو کو اب تک کئی بار شیئر کیا جاچکا ہے اور لوگ ماہا کے لیے انصاف کا مطالبہ کررہے ہیں۔

ویڈیو میں روتے ہوئے انصاف کی دہائی دیتی ماہا ملک  نے خود کو گلشن اقبال میکاسا اپارٹمنٹ کی رہائشی بتایا ہے۔

ماہا ملک نے ویڈیو میں بتایا کہ ہم لوگ کہیں  باہر سے واپس آرہے تھے تو میری بہن کو ایک شخص نے تھپڑ مارا  جبکہ دوسرے شخص نے میرے والد کو بھی مارا۔

انہوں نے بتایا کہ کسی نے ہماری کمپلین نہیں سنی،پولیس والے ان کے ساتھ ملے ہوئے ہیں۔ وہ عناصر میری والدہ کو بھی دھمکاتے ہیں ۔

ماہا ملک نے ویڈیو میں مزید انکشاف کیا کہ انہوں نے ان حالات سے تنگ آکر دو مرتبہ خودکشی  کی بھی  کوشش کی لیکن دونوں مرتبہ بچ گئیں۔

چند عناصر کی ہراسانی سے پریشان لڑکی نے انصاف نہ ملنے پر سوشل میڈیا کا سہارا لیا تو اس کی ویڈیو وائرل ہوگئی۔

ماہا ملک نے ویڈیو کے اختتام پر انصاف کے لیے دہائی دی اور حکام سے سنوائی کی  اپیل کردی۔