چیئرمین پاکستان پیپلزپارٹی بلاول بھٹو زرداری نے کہا ہے کہ پی ٹی آئی اور آئی ایم ایف بجٹ ہماری معیشت کو سونامی کی طرح تباہ کر دے گا۔

چیئرمین پیپلز پارٹی بلاول بھٹو نے کہا ہے کہ سلیکٹڈ وزیراعظم عوام سے اس بات کا انتقام لے رہے ہیں کہ انہیں ووٹروں نے حق رائے دہی کا استعمال کرکے منتخب کیوں نہیں کیا؟ وفاقی بجٹ کے اعدادوشمار اس بات کا اظہار ہیں کہ ملک کو تباہی کی سمت ڈال دیا گیا ہے۔

 بلاول بھٹو زرداری نے کہا کہ حکومتی بجٹ سے شعبہ صحت، شعبہ زراعت کو تباہ کن نقصانات ہوں گے، اگر بجٹ کے خلاف عوام نے مذاحمت نہ کی تو غربت اور قحط جیسی صورتحال کا سامنا کرنا پڑ سکتا ہے۔

بلاول بھٹو زرداری نے کہا کہ بجٹ میں کورونا وائرس کی وباءاور ٹڈی دَل کے حملوں کو نظرانداز کرنا افسوسناک ہے۔

چیئرمین پیپلزپارٹی نے کہا کہ وفاقی بجٹ میں طبی عملے، تنخواہ دار طبقے، پنشنز اور پسماندہ افراد کو نظرانداز کیا گیا ہے، بجٹ میں بزرگوں کی پنشنز کو نہ بڑھاکر انہیں مجبور کیا گیا ہے کہ وہ وباءکے دنوں میں گھر سے باہر نکلیں۔

بلاول بھٹو زرداری نے کہا کہ دنیا اپنے بزرگوں کے گھر پر رہنے کی تدابیر کر رہی ہے اور ہم انہیں گھر نکالنے کی صورتحال پیدا کر رہے ہیں۔

بلاول بھٹو زرداری نے کہا کہ پی ٹی آئی ایم ایف بجٹ دراصل اشرافیہ کے لئے تیار کیا گیا ہے، وفاقی بجٹ میں عام آدمی اور غریبوں کے لئے کوئی ریلیف نہیں ہے۔

چیئرمین پیپلزپارٹی نے کہا کہ پیپلزپارٹی بجٹ کو مسترد کر چکی ہے اور اب ہر فورم پر اس کی مخالفت کی جائے گی۔